Prokuroria Themelore në Mitrovicë dhe Policia e Kosovës kanë njoftuar se, gjatë aksioneve të zhvilluara në Mitrovicën e Veriut dhe në zona të tjera, janë sekuestruar mallra të kontrabanduara me vlerë mbi 200 mijë euro dhe 22 automjete.
Në komunikatën e përbashkët thuhet se hetimet kanë nisur më 24 prill, kur janë zbatuar edhe masa të veçanta hetimore. Ato janë realizuar nga Policia e Kosovës në koordinim me Prokurorinë, Doganën e Kosovës dhe Agjencinë e Kosovës për Inteligjencë.
“Mallrat përfshijnë kryesisht produkte ushqimore, pije alkoolike, joalkoolike dhe energjike, cigare dhe barna pa banderola, produkte higjienike, si dhe tekstile, përfshirë veshje me marka tregtare të mbrojtura, pa autorizimin apo licencën përkatëse”, thuhet në njoftim.
Po ashtu, në njërin prej rasteve janë gjetur 504 shpezë të gjalla, pa dokumentacion mbi origjinën dhe pa certifikata shëndetësore. Me vendim të inspektorit veterinar, ato janë asgjësuar për shkak të rrezikut për shëndetin e njerëzve.
Sipas institucioneve, në kuadër të këtij hetimi janë ndërmarrë mbi 20 aksione në zonat kufitare dhe në vendbanimet e komunave të Zubin Potokut, Zveçanit, Leposaviqit dhe Mitrovicës së Veriut.
“Hetimet janë në fazën përfundimtare, ndërsa Prokurori i Shtetit, pas vlerësimit të të gjitha provave të siguruara, brenda afateve ligjore do të marrë vendimet përkatëse, në pajtim me Kodin e Procedurës Penale”.