Ushtarët profesionistë në Maqedoninë e Veriut do të kenë mundësi të vazhdojnë punën në Armatë edhe pas moshës 45-vjeçare, por me statusin e personelit civil dhe me kontratë pune me afat të pacaktuar.
Vendimi është miratuar sot nga Qeveria, ndërsa ministri i Mbrojtjes, Vllado Misajllovski, deklaroi se me këtë zgjidhet një problem shumëvjeçar i ushtarëve profesionistë.
Pagat bazë dhe të gjitha shtesat do të mbeten të pandryshuara, ndërsa ushtarët do të vazhdojnë të kenë mundësinë e marrjes së kompensimit për largim ose të transferimit në institucione të tjera.
Shefi i Shtabit të Përgjithshëm, gjeneralmajor Sashko Lafçiski, sqaroi se ushtarët që zgjedhin të qëndrojnë do të angazhohen kryesisht në sigurimin e kazermave, objekteve dhe pronës ushtarake.
Sipas vlerësimeve fillestare, rreth 100 ushtarë profesionistë mund ta shfrytëzojnë këtë mundësi që në vitin 2027. Pensionimi do të vazhdojë sipas rregullave ekzistuese.