Shefi i ushtrisë britanike, gjenerali Sir Roly Walker, ka paralajmëruar se Mbretëria e Bashkuar do të nisë një debat publik për nevojën e përgatitjes për luftë, duke theksuar se mbrojtja e vendit do të kërkojë sakrifica edhe nga qytetarët
Gjatë një vizite në bazën ushtarake Catterick Garrison, në veri të Yorkshire-it, Walker iu drejtua rreth 700 ushtarëve, duke u thënë se vendi do të ketë nevojë për ndihmën e tyre dhe të gjithë shoqërisë.
“Ndoshta nuk jeni të vetëdijshëm, por vendit tonë do t’i duhet ndihma juaj”, deklaroi ai, duke kujtuar se dikur Mbretëria e Bashkuar as që dëshironte të mendonte për mundësinë që ushtarët e saj të përfshiheshin në luftë.
Sipas tij, udhëheqësit politikë britanikë së shpejti do të zhvillojnë një “bisedë të hapur” me qytetarët për zhvillimet e sigurisë dhe rreziqet me të cilat përballet vendi.
Walker theksoi se qytetarëve do t’u kërkohet të pranojnë sakrifica, në mënyrë që mbrojtja dhe siguria kombëtare të marrin përparësi.
Ai shtoi se edhe personat për të cilët mbrojtja nuk është ndër prioritetet kryesore duhet të marrin përsipër pjesën e tyre të përgjegjësisë për sigurinë e vendit.
“Edhe ata do të duhet të bëjnë sakrifica të caktuara”, u shpreh gjenerali, duke nënvizuar rëndësinë e mbështetjes së ushtrisë dhe të punës së saj.
Ndërkohë, kryeministri britanik Andy Burnham ka marrë përsipër zotimin e paraardhësit të tij, Keir Starmer, për të nisur një debat kombëtar mbi mbrojtjen, një premtim që ishte bërë më shumë se 18 muaj më parë.
Qeveria pritet gjithashtu të nisë një fushatë për t’i nxitur familjet të përgatiten më mirë për kriza të ndryshme, përfshirë përmbytjet, thatësirat dhe konfliktet e armatosura. Megjithatë, ky plan, i trashëguar nga qeveria e mëparshme, ende nuk është zbatuar. /Telegrafi/