Gashi shpreh shqetësim për retorikën nacionaliste në Serbi, deklaratat për Kosovën🇽🇰 dhe faktin që Milan Radoiçiqi vazhdon të jetë i lirë në Serbi pas sulmit në Banjskë. – https://www.albinfo.ch/arber-gashi-deputeti-shqiptar-ne-suedi-kerkon-qendrimin-e-qarte-te-suedise-per-kosoven/
Deputeti i Parlamentit të Suedisë, Arbër Gashi, ka ngritur shqetësimin për zhvillimet politike dhe të sigurisë në Ballkanin Perëndimor, duke kërkuar që Suedia të mbajë një qëndrim më të qartë dhe më të vendosur në mbrojtje të pavarësisë së Kosovës, transmeton albinfo.ch.
Gashi ka vënë në dukje zhvillimet në Serbi, përfshirë dhunën ndaj protestuesve, arrestimet arbitrare dhe sulmet ndaj gazetarëve, të cilat, sipas tij, kërkojnë vëmendje serioze.
Ai ka shprehur gjithashtu shqetësim për rikthimin e retorikës nacionaliste ndaj Kosovës. Në këtë kontekst, ka rikujtuar deklaratat e ministres serbe Paunović, e cila ka thënë se, po të ishte në vendin e Sllobodan Millosheviqit gjatë viteve ’90, do të kryente spastrimin etnik të shqiptarëve të Kosovës.
Sipas Gashit, shqetësuese është edhe pjesëmarrja e ministrave serbë në varrimin e Ratko Mladićit, i dënuar për gjenocid.
Deputeti suedez ka rikujtuar edhe deklaratën e ministrit të Brendshëm të Serbisë, Ivica Dačić, i cili gjatë tetorit ka thënë se flamuri serb herët a vonë do të ngrihet në Prizren.
Ai ka ngritur pikëpyetje edhe për faktin se Milan Radoiçiqi, i cili ka pranuar se drejtoi grupin e përfshirë në sulmin e armatosur në Banjskë, ku u vra polici i Kosovës, Afrim Bunjaku, vazhdon të jetë i lirë në Serbi. Radoiçiqi është shfaqur së fundmi edhe në një tubim zgjedhor përkrah presidentit serb, Aleksandar Vučić.
Gashi ka theksuar se pasojat e luftërave vazhdojnë të ndihen në jetën e njerëzve në rajon dhe se pretendimet territoriale mund të shtojnë frikën dhe mosbesimin ndërmjet komuniteteve.
Në këtë drejtim, ai kërkon që Suedia të shprehet më qartë për zhvillimet në rajon, të mbrojë respektimin e pavarësisë së Kosovës dhe të mos i nënvlerësojë rreziqet që, sipas tij, paraqesin retorika nacionaliste dhe tendencat për rikthim te politikat e së kaluarës./Albinfo.ch