Fluturimet direkte në linjën Dubai-Shkup duhet të fillojnë në mars të vitit 2027, njoftoi zëvendëskryeministri dhe ministri i Transportit Aleksandar Nikoloski. Sipas tij, linja ajrore është dakorduar ndërsa do të operohet nga kompania ajrore “Flydubai”.
Lidhja e re ajrore duhet të vendoset me fillimin e sezonit veror të fluturimeve në mars të vitit të ardhshëm. Nikoloski vlerësoi se linja do të kontribuojë në rritjen e numrit të turistëve, por edhe në promovimin e shkëmbimit të biznesit dhe bashkëpunimit ekonomik midis Maqedonisë dhe Emirateve të Bashkuara Arabe.
“Kjo është dakorduar tashmë dhe ‘Flydubai’ do të fillojë të fluturojë direkt nga Dubai në Shkup në mars të vitit 2027”, tha Nikoloski në Kuvend, pas një takimi me ambasadorin e Emirateve të Bashkuara Arabe.
Dubai ishte shpallur më parë si një nga destinacionet e reja direkte nga Aeroporti i Shkupit, së bashku me Barcelonën, Lionin dhe Shtutgartin.
Paralelisht, po zhvillohen bisedime për të krijuar një linjë ajrore direkte midis Ohrit dhe njërit prej aeroporteve në Emiratet e Bashkuara Arabe. Abu Dhabi dhe Sharjah po konsiderohen si destinacione të mundshme, por ende nuk është arritur një marrëveshje për këtë linjë.
Sipas ministrit, fluturimet e reja janë pjesë e aktiviteteve më të gjera për të lidhur më mirë dy aeroportet e Maqedonisë me destinacionet ndërkombëtare dhe për të tërhequr turistë gjatë gjithë vitit, dhe jo vetëm gjatë sezonit kryesor të verës.