Në piknikun e 12-të humanitar të “Alkaloid” janë mbledhur rreth 2.2 milionë denarë, të dedikuara për blerjen e pajisjeve moderne mjekësore për Klinikën Universitare për Sëmundje Respiratore te Fëmijët “Kozle”.
Donacioni do të përdoret për blerjen e një kolone moderne bronkologjike me fibërbronkoskop, pajisje që mundëson ekzaminim të drejtpërdrejtë dhe të saktë të rrugëve të frymëmarrjes te fëmijët.
Pajisja do të përdoret për diagnostikimin dhe trajtimin në kohë të sëmundjeve të mushkërive, si dhe në raste urgjente kur fëmijët kanë thithur trupa të huaj në rrugët e frymëmarrjes.
Nga fillimi i iniciativës në vitin 2011 e deri më sot, përmes piknikëve humanitarë të “Alkaloid” janë mbledhur gjithsej rreth 14 milionë denarë, të dedikuara për institucione shëndetësore, organizata humanitare dhe kategori të ndryshme të qytetarëve.
Për rëndësinë e kësaj tradite dhe për njerëzit që e mbajnë atë në vazhdimësi foli edhe Drejtori i Përgjithshëm dhe Kryetar i Bordit Drejtues të “Alkaloid” Zhivko Mukaetov.
“Pas çdo suksesi dhe çdo arritjeje të ‘Alkaloid’-it qëndrojnë njerëzit: ata që kanë vendosur themelet, ata që kanë vazhduar të ndërtojnë dhe ata që sot e çojnë kompaninë përpara. Jam veçanërisht krenar për familjen e madhe të punonjësve të ‘Alkaloid’-it, të cilët edhe këtë herë tregojnë se përkatësia ndaj kompanisë dëshmohet edhe përmes humanizmit, solidaritetit dhe gatishmërisë për të ndihmuar aty ku është më e nevojshme. Veçanërisht më gëzon fakti që donacioni i këtij viti është dedikuar për kushte më të mira të trajtimit të më të vegjëlve, sepse ky është thelbi i misionit tonë: shëndeti mbi të gjitha”, tha Zhivko Mukaetov.