Zëvendëskryeministri i parë i Maqedonisë së Veriut dhe ministër për Çështje Evropiane, Bekim Sali, mori pjesë sot në një diskutim të organizuar nga Këshilli Atlantik në Washington D.C., së bashku me kryeministrin Hristijan Mickoski.
Në fokus të diskutimit ishte partneriteti strategjik me Shtetet e Bashkuara të Amerikës, roli i Maqedonisë së Veriut si aleat në NATO, si dhe çështjet e sigurisë, zhvillimit dhe rrugëtimit drejt Bashkimit Evropian.
Sali tha se nga Washingtoni është përcjellë mesazhi për vazhdimin e angazhimit të vendit në partneritetet strategjike dhe në sigurinë euroatlantike.
“Partneriteti strategjik me Shtetet e Bashkuara të Amerikës, roli ynë si aleat i përgjegjshëm në NATO, siguria, zhvillimi dhe rruga jonë drejt Bashkimit Evropian ishin në fokus të diskutimit”, theksoi Sali.
Ai shtoi se Maqedonia e Veriut mbetet e përkushtuar ndaj partneriteteve strategjike dhe synimit për një të ardhme më të fortë, më të sigurt dhe më prosperuese.