Sot, u zhvillua aktiviteti kushtuar prezantimit të rezultateve të realizuara në kuadër të projektit të financuar nga Bashkimi Evropian përmes IPA 2021, “BE kundër krimit të organizuar, në mbështetje të tregtisë”.
Në këtë aktivitet u prezantuan rezultatet konkrete të mbështetjes së Bashkimit Evropian për Administratën Doganore, me fokus në modernizimin e kapaciteteve operative dhe teknologjike, rritjen e efikasitetit të kontrolleve doganore dhe forcimin e luftës kundër krimit të organizuar dhe aktiviteteve të paligjshme në tregti.
Në kuadër të projektit janë siguruar pajisje moderne dhe të specializuara për kontroll dhe hetime, pajisje të avancuara të teknologjisë së informacionit, si dhe 26 automjete operative të dedikuara për ekipet mobile doganore dhe njësinë K-9. Këto mjete do të mundësojnë reagim më të shpejtë dhe kontrolle më efikase në terren, duke kontribuar drejtpërdrejt në rritjen e sigurisë dhe mbrojtjen e kufijve doganorë.
Një pjesë e rëndësishme e projektit është edhe zhvillimi i zgjidhjeve moderne digjitale, përfshirë sistemet të cilat kontribuojnë në thjeshtimin e procedurave, digjitalizimin e proceseve dhe krijimin e një administrate doganore më efikase, transparente dhe të orientuar drejt standardeve evropiane.
Gjatë eventit u theksua rëndësia e bashkëpunimit të vazhdueshëm ndërmjet Drejtorisë së Doganave dhe partnerëve evropianë, veçanërisht në procesin e modernizimit dhe të përafrimit të mëtejshëm me praktikat dhe standardet e Bashkimit Evropian.
Ky aktivitet dëshmoi se mbështetja evropiane po përkthehet në rezultate konkrete dhe të prekshme, të cilat do të ndikojnë pozitivisht në punën e përditshme të Administratës Doganore, në sigurinë e tregtisë dhe në ofrimin e shërbimeve më të shpejta dhe më cilësore për qytetarët dhe komunitetin e biznesit