Infermierja Ljubica Shavreska ka ndarë publikisht përvojën e saj të dhimbshme dhe traumatike nëpër labirintet e sistemit shëndetësor maqedonas, e cila fatkeqësisht përfundoi me humbjen e fetusit në javën e 24-t të shtatzënisë.
Përmes një reagimi të hapur drejtuar Ministrisë së Shëndetësisë, ajo rrëfen orët e kaluara me dhimbje, pasiguri dhe, siç thotë ajo, me trajtim shpërfillës nga personeli mjekësor në disa institucione shëndetësore.
“Nuk kërkoj hakmarrje, kërkoj një sistem ku askush të mos ketë nevojë të kërkojë privilegj për t’u shpëtuar.”
Edhe pse beson se rezultati i shtatzënisë së saj ndoshta nuk mund të ishte parandaluar, Shavreska thekson se trajtimi çnjerëzor nga sistemi e bëri përvojën e saj edhe më traumatike.
Ajo thotë se nuk do të ngrejë padi dhe nuk kërkon ndëshkime për mjekët, por dëshiron të sensibilizojë opinionin për mënyrën se si trajtohen pacientët në Maqedoni.
“A duhet një grua shtatzënë të gjakoset, të përjetojë dhimbje të padurueshme dhe të lutet për ndihmë që dikush ta marrë seriozisht? A duhet pacienti të kërkojë ‘lidhje’ për të marrë një kontroll mjekësor?”, pyet ajo, duke përcjellë një mesazh të fuqishëm për institucionet kompetente.
Në reagimin e saj, ajo shpreh gjithashtu mirënjohje të madhe për disa punonjës shëndetësorë dhe persona që u përpoqën ta ndihmonin, duke kujtuar se pas çdo pacienti qëndron një njeri, ndërsa pas çdo gruaje shtatzënë – një nënë.