Kanë kaluar saktësisht një muaj që nga zhdukja e Ljupços dhe ende nuk ka asnjë gjurmë për vendndodhjen e tij. Familja e tij ka përsëritur sot apelin drejtuar qytetarëve, ndërsa nga institucionet kërkon informacion konkret se çfarë është ndërmarrë deri më tani për gjetjen e tij.
Nipi i tij, Darko, thotë se familja prej një muaji po jeton mes pasigurisë, frikës dhe shpresës, ndërsa paralelisht po përpiqet vetë të mbledhë informacione dhe të rindërtojë lëvizjet e fundit të Ljupços.
“Vetë kërkojmë, vetë mbledhim informacione, vetë përpiqemi të kuptojmë se ku dhe si ka lëvizur gjatë ditëve të fundit. Dhe këtu duhet të pyes publikisht: çfarë po ndodh me kërkimin?”, shkruan Darko.
Sipas tij, edhe pse Ljupço është raportuar si person i zhdukur, familja deri më tani nuk ka marrë informacion konkret nga institucionet për veprimet e ndërmarra në kuadër të kërkimit.
“Unë, si anëtar i familjes, deri më sot nuk kam marrë asnjë informacion konkret nga asnjë institucion se çfarë është ndërmarrë dhe çfarë është kontrolluar. Ljupço është raportuar si i zhdukur, e megjithatë nuk e shohim as në faqen zyrtare të MPB-së në mesin e personave të zhdukur”, thekson ai.
Familja kërkon gjithashtu përgjigje nëse gjatë kërkimit po përdoren pamjet e kamerave të sigurisë nëpër Shkup dhe mundësitë e sistemit “Qyteti i Sigurt”, pasi, siç thotë Darko, ekzistojnë informacione për disa nga lëvizjet e fundit të Ljupços.
“A duhet familja vetë të zbulojë se ku ka lëvizur personi i zhdukur? A duhet ne vetë të kërkojmë kamerat, dëshmitarët dhe gjurmët e tij të fundit? Kush po e udhëheq aktivisht kërkimin për Ljupçon?”, pyet ai.
Darko thekson se familja nuk kërkon asgjë më shumë nga institucionet përveç informacionit se çfarë është bërë gjatë këtij muaji.
“Ljupço nuk është vetëm një numër raportimi. Ljupço është vëlla, dajë, baba, bashkëshort dhe një njeri që ka një familje e cila çdo ditë pret që ai të kthehet në shtëpi”, thuhet në apelin e familjes.
Në të njëjtën kohë, familja u bën thirrje qytetarëve të Shkupit dhe rrethinës që të jenë të vëmendshëm dhe të raportojnë nëse e kanë parë Ljupçon apo nëse kanë ndonjë informacion që mund të ndihmojë në gjetjen e tij.
“Ju lutemi, shpërndajeni. Mos lejoni që asnjë gjurmë të neglizhohet. Një muaj pa asnjë gjurmë. Ljupço duhet të gjendet”, apelon Darko.
Çdo informacion mund të raportohet në numrin 112 për raste urgjente, në polici në 192, ose te familja përmes Viberit në numrin +43 660 482 5979.