Drejtori operativ i FIFA, Kevin Lamour është shkarkuar nga pozicioni i tij pasi kritikoi hapur planin e Gianni Infantinos për të shitur një pjesë të të drejtave komerciale të Kupës së Botës te investitorë privatë.
Në këtë zhvillim të rëndësishëm në institucionin më të lartë të futbollit botëror, Lamour largohet nga detyra e tij pas vetëm më pak se 2 vitesh. Ai e kritikoi ashpër projektin FFE të Infantinos duke pohuar se administrata e FIFA u mashtrua duke shtuar se presidenti beson se mishëron FIFA kur ai supozohet të jetë në shërbim të saj.
Lamour në të njëjtën kohë e bëri të qartë se ishte i gatshëm të humbiste vendin e punës pas kundërshtimit të planit që u pezullua disa orë Më vonë, pasi ai shprehu kundërshtimin e tij në 31 korrik. ‘Nëse kjo do të thotë se unë do të humbas punën, kështu qoftë-kishte deklaruar ai në një komunikëtë-do ta kuptoj dhe respektoj atë vendim. Të paktën do të fle mirë sonte’
Në atë komunikatë Lamour ndër të tjerat tha se kolegët e tij meritojnë diçka më të mirë se përbuzja dhe intimidimi. ‘Ndjesia ime është që të gjithë ne duam të jemi krenarë që punojmë për FIFA dhe sot, për fat të keq duket se ky nuk është më rasti për shumë prej nesh-shtoi Lamour. Në të njëjtën ditë, një prej këshilltarve e Infantinos, Carlos Cordeiro dha dorëheqjen në shenjë proteste ndaj propozimeve të Infantinos
Rrethanat e shkarkimit të Lamour nuk janë të qarta, por sekretari i përgjithshëm i FIFA, Mattias Grafström, informoi stafin përmes një emaili se Lamour do të largohej nga FIFA
‘FIFA mund të konfirmojë se marrëdhëniet e punës me Kevin Lamour si Drejtor Operativ janë mbyllur në 17 gusht 2026-tha një zëdhënës i qeverisë së futbollit botëror-FIFA falënderon Kevin për shërbimin e tij në këto 2 vjet dhe i uron fat dhe më të mirën për të ardhmen. Nuk do të bëhen më komente në lidhje me këtë çështje’
Kevin Lamour ka qenë zëvendëssekretar i përgjithshëm i UEFA përpara se të shkonte në FIFA. Ai është bashkuar me qeverinë e futbollit evropian në 2007. Largimi i tij është edhe më i bujshëm edhe për shkak të marrëdhënies së gjatë profesionale me Infantinon, me të cilin ai kishte punuar gjithashtu në UEFA. Ndërkaq, presidenti i FIFA vazhdon të jetë nën presion pas dështimit të planit të tij teksa vijohet me përpjekjet për ta shkarkuar atë nga posti i tij.