Hetimi për vjedhjen e rëndë të transformatorëve në Hekurudhat e Maqedonisë po përparon. Nga Ministria e Punëve të Brendshme kanë bërë të ditur se po ndërmerren një sërë veprimesh për zbardhjen e rastit. Është kryer ekspertizë në vendngjarje dhe janë marrë gjurmë, të cilat janë dërguar për ekspertizë të mëtejshme.
Jozyrtarisht, mëson „Fokus“, janë marrë në pyetje rreth 50 persona që kanë njohuri dhe aftësi për të çaktivizuar tensionin e lartë. Sipas burimeve të përfshira në hetim, pas marrjes në pyetje, numri i personave të dyshuar është reduktuar në rreth 20, ndërsa njëri prej tyre dyshohet se është i përfshirë drejtpërdrejt në operacionin e paligjshëm.
Gjithashtu, nën lupë janë vendosur të gjitha pikat e regjistruara të grumbullimit dhe përpunimit të hekurit dhe metaleve, pasi bakri i vjedhur diku duhet të jetë shitur ose depozituar.
Hetimi ka të bëjë me vjedhjen në nënstacionin elektrik tërheqës në Draçevë, i cili ndodhet ndërmjet stacioneve hekurudhore Lisiçe dhe Draçevë. Në këtë objekt është shkaktuar dëmtim pothuajse i plotë i një pjese të rëndësishme të pajisjeve elektroenergjetike të infrastrukturës hekurudhore, ndërsa dëmi material vlerësohet ndërmjet 3 dhe 5 milionë euro.
Sipas njoftimit fillestar të Ndërmarrjes Publike për Infrastrukturën Hekurudhore, gjatë vjedhjes janë përmbysur me forcë dy transformatorë të mëdhenj elektroenergjetikë, secili me peshë rreth 27 tonë. Nga transformatorët është nxjerrë dhe derdhur vaji i transformatorëve, ndërsa mbështjelljet prej bakri dhe komponentët e tjerë me vlerë janë hequr dhe vjedhur tërësisht.
Nga nënstacioni janë vjedhur edhe tela bakri, shina dhe shufra bakri, si dhe pothuajse të gjitha pajisjet dhe elementet e nevojshme për funksionimin e tij. Si pasojë, objekti është bërë plotësisht jofunksional.
„Ky rast nuk paraqet vetëm një vjedhje të bakrit dhe pajisjeve, por një sulm të rëndë ndaj infrastrukturës kritike hekurudhore dhe pronës së shtetit dhe qytetarëve. Dëmtimi i objekteve të tilla mund të shkaktojë pasoja serioze për sigurinë, stabilitetin dhe funksionimin e rregullt të trafikut hekurudhor“, kishin deklaruar nga ndërmarrja menjëherë pas vjedhjes, në fund të muajit korrik.
Ndërkohë, nga Ministria e Punëve të Brendshme për „Fokus“ kanë konfirmuar:
„Në lidhje me vjedhjen e rëndë të transformatorëve në infrastrukturën e Hekurudhave të Maqedonisë, Njësia për Çështje Kriminalistike Aerodrom dhe Draçevë pranë SPB Shkup po ndërmerr një sërë veprimesh për zbardhjen e veprës penale dhe përcaktimin e rrethanave të tjera që lidhen me të. Është kryer këqyrje në vendngjarje dhe janë marrë gjurmë, të cilat janë dërguar për ekspertizë të mëtejshme.“
Sipas burimeve jozyrtare të „Fokus“, hetimi po ngushton rrethin e personave të dyshuar. Bëhet fjalë për një vjedhje komplekse dhe specifike, pasi për realizimin e saj është dashur të çaktivizohet tensioni i lartë. Sipas burimeve, në vend ka rreth 50 persona që kanë njohuri për mënyrën e çaktivizimit të tensionit të lartë.
Të gjithë ata janë marrë në pyetje dhe, sipas burimeve të hetimit, lista është reduktuar në rreth 20 persona, ndërsa njëri prej tyre dyshohet se është i përfshirë në operacion.
Ministri i Transportit, Aleksandar Nikolloski, ditët e fundit e ka cilësuar rastin si një „grabitje si në film“, duke theksuar se një operacion i tillë mund të realizohej vetëm nga persona shumë të specializuar dhe me përdorimin e mekanizimit të rëndë ndërtimor.
Sipas tij, autoritetet në përgjithësi e dinë se cilët persona kanë kapacitetin për të kryer një veprim të tillë dhe tani hetimi duhet të përcaktojë se kush konkretisht ka qenë i përfshirë.
Nikolloski deklaroi se bakri është nxjerrë nga dy transformatorët me ndihmën e mekanizimit të rëndë dhe ekspertëve, me qëllim shitjen e tij në tregun e zi. Ai shtoi se çmimi i bakrit në tregjet botërore është aktualisht shumë i lartë dhe se kjo mund ta ketë bërë vjedhjen një „biznes“ tërheqës për autorët.
Ministri paralajmëroi gjithashtu se veprimi ka mundur të shkaktojë pasoja serioze për sigurinë dhe funksionimin e trafikut hekurudhor, përcjell Zhurnal.mk.