Kryeministri në detyrë, Albin Kurti, ka emëruar Hysen Muzliukajn si kryesues të Komisionit të Pranimit që do të merret me përzgjedhjen e Drejtorit Ekzekutiv të Agjencisë Qendrore të Prokurimit (AQP). Ndaj Muzliukajt Gjykata e Apelit ka vërtetuar aktvendimin për konfirmimin e aktakuzës, në një rast ku ai akuzohet për keqpërdorim të detyrës zyrtare.
Vendimi për emërimin e tij është marrë në mbledhjen e Qeverisë të 12 gushtit 2026.
Muzliukaj do të bëjë vlerësimin për pozitën më të rëndësishme në prokurimin publik, atë të Drejtorit të Agjencisë Qendrore të Prokurimit (AQP).
Muzliukaj, i njohur si ish-këshilltar politik i ministrit të Bujqësisë, Faton Peci, dhe ish-drejtor komunal në Mitrovicë gjatë mandatit të Agim Bahtirit, ishte arrestuar në korrik të vitit 2023 nga Prokuroria Speciale, së bashku me ish-nënkryetarin e Mitrovicës, Faruk Mujkën.
Në atë kohë, Prokuroria kishte njoftuar se ndaj Muzliukajt ishte lëshuar urdhër për bastisjen e banesës, ndërsa ai u lirua një ditë pas arrestimit për t’u mbrojtur në liri.
Ndërsa Gjykata e Apelit, më 20 shkurt 2026, kishte refuzuar si të pabazuara ankesat e mbrojtjes dhe kishte vërtetuar aktvendimin e Gjykatës Themelore në Prishtinë për refuzimin e kërkesave për kundërshtimin e provave dhe hudhjen e aktakuzës.
Sipas aktakuzës, Muzliukaj, në cilësinë e ish-drejtorit për Gjeodezi, Kadastër dhe Pronë në Komunën e Mitrovicës, akuzohet për keqpërdorim të detyrës zyrtare në lidhje me rastin e këmbimit të pronës së ish-Bankosit me pronë private.