Nga Prokuroria për krim të organizuar në Shkup informuan sot se është ngritur aktakuzë për rastin “Lotaria”, në mesin e të akuzuarve të të cilit është edhe ish-zëvendëskryeministri Artan Grubi.
Prokuroria Themelore Publike Shkup ka ngritur aktakuzë kundër gjithsej 8 personave si bashkëkryerës në veprën penale – Keqpërdorim i pozitës dhe autoritetit zyrtar nga neni 353 paragrafi 5 në lidhje me paragrafin 4 dhe paragrafin 1 të Kodit Penal.
Të akuzuarit, gjatë viteve 2023 dhe 2024, së bashku kanë ndërmarrë veprime me të cilat kanë tejkaluar kufijtë e autorizimeve dhe detyrave të tyre të veçanta, me qëllim që t’i shkaktojnë dëm personit juridik të dëmtuar Shoqërisë Aksionare për Organizimin e Lojërave të Fatit “Lotaria Shtetërore e Republikës së Maqedonisë së Veriut” në vlerë të konsiderueshme prej 507.632.173 denarë (afro 8.25 milionë euro).
Ata kanë qenë të vetëdijshëm se Shoqëria Aksionare për Organizimin e Lojërave të Fatit “Lotaria Shtetërore e Republikës së Maqedonisë së Veriut” nuk kishte të drejtë të organizonte lojëra elektronike të fatit në terminale të videollotarisë në territorin e vendit, pasi në vitin 2013 e kishte investuar këtë të drejtë si investim jo monetar me vlerë prej 6.244.898 euro gjatë themelimit të Shoqërisë për Organizimin e Lojërave të Fatit “Videollotaria Shtetërore – Casinos Austria” Sh.P.K. Shkup, për çka kishte fituar aksion në lartësi prej 51% të kapitalit themeltar të shoqërisë.
Përkundër kësaj, i akuzuari i parë, drejtor i përgjithshëm dhe kryetar i Këshillit Drejtues të “Lotarisë Shtetërore”, më 09.05.2023, i ka dorëzuar të akuzuarit të tretë – Sekretarit të Përgjithshëm të Qeverisë së RMV-së, Informacion për nevojën e ndërmarrjes së aktiviteteve për organizimin e pavarur të lojërave elektronike të fatit. Në informacion me propozim-përfundimet ai ka theksuar se vlera e furnizimit arrin në 42% të vlerës kontabël të pasurisë së shoqërisë, e përcaktuar në bazë të raporteve të fundit financiare të shoqërisë dhe si e tillë do të paraqesë një marrëveshje/transaksion të madh, ndërsa miratimi i saj është në kompetencë të Këshillit Mbikëqyrës të shoqërisë.
Sekretari i Përgjithshëm më 06.06.2023 e ka propozuar këtë informacion si plotësim të pikës së rendit ditor të një seance qeveritare, duke vepruar në kundërshtim me nenin 119 paragrafi 2 të Rregullores së Punës të Qeverisë së RMV-së dhe nuk ia ka kthyer informacionin parashtruesit, gjegjësisht nuk ia ka përcjellë organit kompetent.
I akuzuari i dytë, i cili ka pasur ndikim real në udhëheqjen e SHA Lotaria Shtetërore, në cilësinë e personit përgjegjës, ka kryesuar seancën e Qeverisë së Republikës së Maqedonisë së Veriut në cilësinë e Kuvendit të Lotarisë Shtetërore dhe ka propozuar që pika e plotësuar e rendit ditor të miratohet, megjithëse ka qenë i vetëdijshëm se vendimi nuk është në kompetencë të Qeverisë si Kuvend i Shoqërisë Aksionare.
Informacioni i dorëzuar është miratuar dhe Shoqëria Aksionare për Organizimin e Lojërave të Fatit “Lotaria Shtetërore e Republikës së Maqedonisë së Veriut” është ngarkuar t’i ndërmarrë aktivitetet e nevojshme për fillimin e organizimit të pavarur të lojërave elektronike të fatit dhe zbatimin e një furnizimi publik të terminaleve të videollotarisë.
Të akuzuarit e tjerë, kryetari dhe anëtarët e Këshillit Mbikëqyrës, megjithëse e dinin se procedura ligjore nuk ishte respektuar, sollën vendim me të cilin miratuan fillimin e procedurës për furnizim publik të terminaleve të videollotarisë për organizimin e lojërave elektronike të fatit si transaksion i madh. Furnizimi publik u realizua dhe u morën përsipër detyrime për pagesë me të cilat SHA “Lotarisë Shtetërore” i u shkaktua dëm në shumën e cekur (mbi 507 milionë denarë, respektivisht mbi 8.25 milionë euro), thonë nga Prokuroria.
Prokuroria kërkon paraburgim për ish-drejtorin e Lotarisë, Përparim Bajrami, i cili është në arrati, ndërsa kërkon paraburgim shtëpiak për Grubin.
Duke pasur parasysh se i akuzuari i parë është ende i paarritshëm për organet e ndjekjes, gjegjësisht ndodhet në arrati, nuk është gjetur dhe privuar nga liria për gati një vit, prokurori publik kërkoi që ndaj tij të caktohet masa e paraburgimit prej 30 ditësh nga dita e gjetjes.
Për të akuzuarin e dytë është propozuar vazhdimi i masës së caktuar më parë të paraburgimit shtëpiak, e cila i është caktuar së bashku me masën e kujdesit – konfiskimi i përkohshëm i dokumentit të udhëtimit dhe ndalimi i lëshimit të dokumentit të udhëtimit apo dokumentit tjetër për kalimin e kufirit shtetëror.
Prokurori publik kompetent propozoi gjithashtu që
për të akuzuarit e tjerë të caktohen masa kujdesi – detyrimi që të paraqiten kohë pas kohe në Gjykatë, konfiskimi i përkohshëm i dokumentit të udhëtimit apo dokumentit tjetër për kalimin e kufirit shtetëror, si dhe ndalimi i afrimit ose vendosjes, respektivisht mbajtjes së kontakteve apo lidhjeve me persona të caktuar, informojnë nga Prokuroria.(INA)