Azizi kritikon ish-pushtetarët: Marrëveshja e Ohrit u shndërrua në kapital politik për të ruajtur pushtetin
Deputeti i VLEN-it, Adnan Azizi, ka reaguar ashpër lidhur me bilancin e Marrëveshjes së Ohrit, duke kritikuar mënyrën se si ajo është trajtuar politikisht gjatë më shumë se dy dekadave.
“Dëmi më i madh që iu bë luftës së vitit 2001 dhe Marrëveshjes së Ohrit nuk është vetëm se shqiptarët nuk arritën barazinë e plotë. Dëmi më i madh është se një kauzë që duhej të përfundonte me realizimin e të drejtave në vitin 2004, u kthye në një premtim të përhershëm politik”, tha Azizi.
Sipas deputetit të VLEN-it, Marrëveshja e Ohrit ishte paraparë si një proces për përfundimin e konfliktit dhe zbatimin e reformave brenda një afati të përcaktuar. Ai thekson se edhe demilitarizimi i UÇK-së ishte pjesë e këtij procesi dhe se zbatimi i marrëveshjes duhej të ecte paralelisht me përmbushjen e obligimeve të saj.
“Komandantët që hynë në pushtet u dehën nga pushteti dhe harruan arsyen për të cilën ishte bërë lufta. Në vend që Marrëveshja e Ohrit të përfundonte si një kapitull i realizuar i të drejtave dhe barazisë, ajo u shndërrua në një kapital politik të pafund, që përdorej sa herë duhej justifikuar qëndrimi në pushtet”, deklaroi Azizi.
Azizi e lidh këtë situatë me më shumë se dy dekada të qeverisjes së BDI-së, duke thënë se çështjet themelore të Marrëveshjes së Ohrit vazhdojnë të paraqiten si objektiva të së ardhmes, ndonëse kanë kaluar mbi 20 vjet nga nënshkrimi i saj.
“Kanë kaluar më shumë se dy dekada të qeverisjes së BDI-së dhe ende flasim për shtyllat bazë të Marrëveshjes së Ohrit sikur të ishin premtime me afat të pacaktuar”, shtoi deputeti Azizi.
Ai ngriti edhe pyetjen se çfarë është realizuar konkretisht gjatë këtyre viteve.
“ Nëse lufta u bë për drejtësi dhe barazi, pse pas më shumë se 20 vitesh shqiptarëve ende u kërkohet të presin drejtësinë dhe barazinë?”, deklaroi deputeti i VLEN-it.
Sipas Azizit, lufta dhe Marrëveshja e Ohrit janë përdorur politikisht për marrjen dhe ruajtjen e pushtetit, ndërsa ai vlerëson se pas kaq shumë vitesh duhet të kërkohet llogari për rezultatet konkrete të këtij procesi.
“Sot nuk mjafton të thirresh në UÇK-në, në luftën apo në Marrëveshjen e Ohrit. Pas kaq shumë vitesh, pyetja është shumë më konkrete: Çfarë realizuat me gjithë atë pushtet?”, tha Azizi.
Azizi e konsideron të papërfunduar çështjen e barazisë së shqiptarëve, duke theksuar se shqiptarët, sipas tij, ende nuk janë juridikisht element konstituiv në të njëjtën mënyrë si pala maqedonase.
“Një kauzë që përdoret për më shumë se dy dekada për të fituar dhe ruajtur pushtetin, ndërsa të njëjtat të drejta vazhdojnë të mbeten premtime, nuk mund të paraqitet si sukses. Ajo është dëshmi se një ideal i madh u keqpërdor për një qëllim shumë më të vogël: pushtetin”, përfundoi Azizi.