Shumica e nuseve mbërrijnë në dasmën e tyre me veturë, por një fermere nga Somerset i habiti të gjithë fundjavën e kaluar, duke zgjedhur një mënyrë krejtësisht të pazakontë për të shkuar në kishë.
Victoria Lee, 37 vjeçe, mbërriti në ceremoninë e martesës duke kalëruar mbi lopën e saj të preferuar, “White Chocolate Button”, për të cilën thotë se është “pothuajse shoqja e saj më e mirë”.
Lee, e cila është rritur në një fermë familjare në Dorset, tregoi se që në fëmijëri kishte filluar të kalëronte lopë, pasi familja e saj nuk i lejonte të mbante poni.
“U rrita në fermën e familjes në Dorset dhe nuk na lejohej të kishim poni, kështu që fillova të kalëroja lopë.
Mendova: pse të mos e trajnoj White Chocolate Button që të më çojë në kishë?”, rrëfeu ajo.
Ajo kishte provuar të trajnonte edhe një lopë tjetër, të quajtur Basil, por ajo nuk e kishte pranuar idenë, shkruan BBC
“Provova të trajnoja edhe Basilin, por ajo nuk donte. Madje tentoi të më rrëzonte, kështu që e lamë të qetë”, tha Lee.
Lopa e preferuar e nuses nuk ishte e panjohur me vëmendjen dhe festat. Sipas Lee, ajo kishte marrë pjesë edhe më parë në aktivitete të ndryshme në fermë, madje ishte veshur edhe për Halloween.
“Ajo është mësuar të vishet si fantazmë për Halloween. I vendosim një çarçaf mbi trup, me vrima për sytë dhe veshët, kështu që është mësuar me këto gjëra”, tregoi ajo.
Nusja fillimisht u transportua drejt fshatit me traktor, ndërsa pjesën e fundit të rrugës deri te kisha e bëri mbi lopën e saj.
E shoqëruar nga shoqërueset e nuses, Lee dhe White Chocolate Button u nisën drejt kishës, duke tërhequr vëmendjen e të gjithë të pranishmëve.
Pas ceremonisë, jashtë kishës u organizua edhe një pritje simbolike, ku dhëndrri dhe shoqëruesit e tij krijuan një “gardë nderi” duke mbajtur në duar mjete të ndryshme bujqësore.
Por dasma pati edhe një tjetër veçanti: menjëherë pas ceremonisë, të sapomartuarit u kthyen në fermë për të mjelë lopët.
Ndërsa të ftuarit u desh të prisnin për rreth dy orë në pritjen e dasmës, çifti iu bashkua festës më vonë gjatë mbrëmjes, këtë herë pa shoqëruesen e pazakontë të nuses, White Chocolate Button. VIDEO