Ajo që duhej të ishte një derbi i madh në startin e kampionatit të ri të Maqedonisë së Veriut ndërmjet Vardarit dhe Shkëndijës, u kthye në një leksion futbolli nga mysafirët, të cilët triumfuan me rezultat 0:2 në Arenën e Shkupit.
Pas një pjesë të parë të qetë dhe pa raste serioze nga të dyja palët, ndeshja u vendos në pjesën e dytë falë lëvizjeve taktike të skuadrës tetovare. Heroi i takimit ishte Fabrice Tamba, i cili hyri nga stoli dhe realizoi të dy golat e fitores, i pari nga të cilët erdhi në minutën e 55-të pas një asistimi të shkëlqyer nga Ndzengue. Vardari provoi të përgjigjej menjëherë me anë të Pires, por portieri Amzai reagoi në mënyrë fantastike. Në vijim Shkëndija mori kontrollin e plotë, krijoi edhe disa raste të pastra shënimi, ndërsa iu anulua edhe një gol i tretë për pozitë jashtë loje. Me këtë performancë dominante, tetovarët morën tri pikët e para të sezonit dhe dërguan një mesazh të qartë që në xhiron e parë.