Ministri i Shëndetësisë, Sasho Klekovski, në një intervistë për Kanall 5, tha se mungesa e anesteziologëve dhe radiologëve mbetet një nga problemet më të mëdha në shëndetësinë e Maqedonisë së Veriut dhe se kjo nuk mund të zgjidhet brenda natës, pasi specializimet zgjasin gjashtë vjet, transmeton Portalb.mk.
Klekovski vlerësoi se modeli i specializimeve private, i vendosur në vitet 2017 dhe 2018, nuk i ka dhënë rezultatet e pritura. Ai paralajmëroi punësime të reja dhe rritje të numrit të punonjësve shëndetësorë.
“Para pandemisë, në shëndetësinë publike kishte rreth 20.000 të punësuar, ndërsa vitin 2024 e pritëm me rreth 18.000. Në vitin 2025 ky numër u rrit në 18.900. Tani po punësojmë 300 mjekë të rinj specializantë dhe shpresoj që më në fund të përfundojë procesi i punësimit të personave që prej vitesh punojnë me kontratë”, tha Klekovski.
Klekovski theksoi se askush, e sidomos punonjësit shëndetësorë, nuk duhet të angazhohen me kontratë në vepër.
Kujtojmë se Raporti vjetor i Fondit për Sigurim Shëndetësor për vitin 2025 tregoi sistemi i kujdesit shëndetësor parësor përballet me tendencë të qartë të uljes së numrit të mjekëve dhe kontratave të nënshkruara, çka paraqet një sfidë të rëndësishme për funksionimin e shërbimeve bazë shëndetësore. Numri i përgjithshëm i mjekëve ka rënë në 2.783, që paraqet ulje për 13 mjekë krahasuar me vitin paraprak, ndërsa janë shënuar gjithashtu ulje edhe në kontratat e lidhura me institucionet shëndetësore dhe mjekët e kujdesit parësor.
Kjo situatë ndikon drejtpërdrejt në qasjen e qytetarëve ndaj shërbimeve mjekësore dhe tregon për mungesë të vazhdueshme të burimeve njerëzore në sektorin shëndetësor, problematikë me të cilën Maqedonia e Veriut përballet prej vitesh