Avokati i njohur nga Prishtina, Arianit Koci, ka kërkuar informata mbi aksidentin tragjik në rrugën Shkup-Bllacë, që u mori jetën tre bashkatdhetarëve tanë, përcjell INA.
Përmes një porosie publike, ai ka bërë disa kërkesa për ndihmë:
KËRKESË PËR INFORMATA
Kushdo që ka informata lidhur me aksidentin tragjik në segmentin e autostradës Shkup–Bllacë, ku humbën jetën Ejup Tërnava, Xhenet Tërnava dhe Fatmire Shabani, do të më ndihmonte shumë nëse më kontakton me shkrim.
Si avokat i familjeve të viktimave, në veçanti më intereson të di:
– Kush ka qenë ndërtuesi i këtij segmenti?
– Kush e ka mbikëqyrur ndërtimin?
– Kush ka qenë përgjegjës për sigurimin e segmentit?
Segmenti ka qenë zyrtarisht i mbyllur për qarkullim.
Në momentin e aksidentit, hyrja nga e cila automjeti ka hyrë në këtë segment nuk ka qenë e mbyllur fizikisht.
Rreth 300 metra më poshtë ndodhet një hyrje tjetër në të njëjtin segment, e cila ka qenë e mbyllur fizikisht.
Prandaj, është e rëndësishme të sqarohet:
– Pse dy hyrjet e të njëjtit segment nuk kanë qenë të siguruara në të njëjtën mënyrë?
– A ka qenë hyrja ku ka kaluar automjeti e mbyllur fizikisht në ditët apo javët para aksidentit?
– Nëse po, deri kur dhe kur ka ndryshuar kjo gjendje?
– Kush e ka bërë mbylljen fizike të kësaj hyrjeje pas aksidentit, kur dhe me urdhër të kujt?
Nëse dikush ka fotografi, video, dokumente apo çfarëdo informate tjetër që mund të ndihmojë në zbardhjen e këtij rasti, ju lutem të ma dërgojë me shkrim, në cilëndo formë.
Të gjitha informatat relevante do t’ia përcjell Prokurorisë kompetente në Maqedoninë e Veriut, për t’u trajtuar në kuadër të procedurës”, shkruan Koci.
Tre shtetasit e Kosovës Ejup Tërnava, Xhenet Tërnava dhe Fatmire Shabani ndërruan jetë pas një aksidenti të rëndë në Shkup, më 19 korrrik të këtij vit në rrugën Shkup-Bllacë.(INA)