Talenti shqiptar Leart Alija në provë te gjiganti austriak Austria Wien
Një tjetër talent i ri nga futbolli shqiptar po hedh hapa të rëndësishëm drejt arenës ndërkombëtare. Leart Alija, futbollist i gjeneratës 2012 të KF Kumanova Milano 2010, i lindur më 26 qershor 2012 dhe me prejardhje nga Orizarja, Komuna e Likovës, ndodhet në Austri, ku po zhvillon një kamp stërvitor dhe periudhë prove 10-ditore te njëri prej klubeve më të mëdha dhe më të suksesshme austriake, Austria Wien.
Nën drejtimin e trajnerëve profesionistë të klubit vjenez, Learti do t’i nënshtrohet një programi intensiv që përfshin testime fizike, ushtrime teknike e taktike, si dhe ndeshje miqësore. Këto aktivitete do të shërbejnë për të vlerësuar potencialin dhe cilësitë e tij si futbollist. Talenti i ri pritet të shfaqë aftësitë që ka zhvilluar në klubin e tij amë, KF Kumanova Milano 2010, me synimin për të lënë përshtypje pozitive te stafi teknik dhe drejtuesit e Austria Wien. Pjesëmarrja në këtë kamp përbën një arritje të rëndësishme për Leart Alijën, por edhe një vlerësim për punën e bërë nga KF Kumanova në zhvillimin e futbollistëve të rinj. I urojmë Leartit shumë suksese dhe shpresojmë që kjo eksperiencë të jetë një hap i madh drejt realizimit të ëndrrës së tij për të luajtur në futbollin evropian./Televizioni News
