Pas freskimit të shkurtër, Maqedonia e Veriut po hyn sërish në një periudhë me mot të qëndrueshëm, me diell dhe temperatura në rritje.
Sipas parashikimit të Drejtorisë për Punë Hidrometeorologjike (DPHM), nesër moti do të jetë kryesisht me diell, me vranësira të pakta deri mesatare dhe erë të dobët deri mesatare nga veriu. Temperaturat e mëngjesit do të jenë më të këndshme, ndërsa gjatë ditës do të rikthehen vlerat tipike të verës.
Temperaturat maksimale në vend do të lëvizin nga 30 deri në 37 gradë Celsius. Në Shkup pritet mot me diell, erë e dobët nga veriu dhe temperaturë maksimale rreth 35 gradë.
Sipas meteorologëve, ky freskim do të jetë jetëshkurtër. Që nga dita e martë pritet të nisë një valë e re e të nxehtit, ndërsa nga mesi i javës temperaturat në Shkup do të arrijnë 35 deri në 38 gradë Celsius, me ndjesinë termike që mund të kalojë 40 gradë. Në rajonet më të nxehta të vendit, temperaturat maksimale pritet t’i afrohen ose ta tejkalojnë kufirin prej 40 gradësh.
Pjesa më e nxehtë e ditës do të vazhdojë të jetë nga ora 11:00 deri në 17:00. Autoritetet shëndetësore rekomandojnë shmangien e qëndrimit të zgjatur në ambiente të hapura gjatë kësaj periudhe, veçanërisht për të moshuarit, personat me sëmundje kronike, fëmijët dhe gratë shtatzëna.
Meteorologët këshillojnë hidratim të rregullt, veshje të lehta dhe me ngjyra të çelëta, si dhe shmangien e aktiviteteve fizike gjatë orëve me temperatura më të larta.
Nëse parashikimet realizohen, Maqedonia e Veriut edhe këtë javë do të mbetet nën ndikimin e një vale të fortë të të nxehtit, pa reshje të konsiderueshme dhe me shumë orë me diell./INA/