Greqia ka nisur një fushatë publike të targetuar ndaj qytetarëve të Maqedonisë së Veriut që kanë origjinë greke dhe që mund të plotësojnë kushtet për marrjen e shtetësisë greke.
„Greqia ka nevojë për ju. Forconi lidhjen tuaj me atdheun“, thuhet në njoftimin e Ambasadës së Greqisë në Shkup, përcjell INA.
Në njoftim bëhet e ditur se qytetarët mund të gjejnë informacione mbi kushtet, dokumentacionin e nevojshëm dhe hapat bazë për të aplikuar për shtetësi greke në bazë të prejardhjes, përkatësisht përmes prindërve ose gjyshërve me origjinë greke. Procedura nis në konzulatin përkatës grek sipas vendbanimit, ku të interesuarit mund të marrin udhëzime të mëtejshme.
Ambasada u bën thirrje qytetarëve të informohen dhe të verifikojnë nëse i plotësojnë kushtet ligjore, ndërsa udhëzon edhe drejt burimeve zyrtare për detaje shtesë.
Kjo iniciativë e Athinës zyrtare ndjek një praktikë të ngjashme që e ka aplikuar prej viteve edhe Bullgaria. Siç dihet, mijëra qytetarë nga Maqedonia e Veriut tashmë janë pajisur me pasaporta bullgare duke deklaruar origjinën e tyre bullgare për të fituar të drejtën e shtetësisë.
