Një gjest i rrallë humanizmi ka ardhur nga familja Aliji nga Gradeci, pronarë të Doner Forina, të cilët çdo të Xhuma dhurojnë ushqim për fëmijët e Qendrës “Bashkarisht Mundemi”.
Shpandi Salija nga Qendra “Bashkarisht Mundemi”, përmes një falënderimi publik, shprehu mirënjohjen për Jetmir Alijin, Faton Alijin dhe Egzon Alijin, të cilët, pa asnjë shpërblim financiar, sigurojnë ushqim për fëmijët, të cilët ai i quan me përkushtim “Engjëjt tanë”.
Ky veprim vjen si një shembull i solidaritetit dhe përgjegjësisë shoqërore, duke dëshmuar se me pak mirësi mund të sjellësh shumë buzëqeshje. Qendra “Bashkarisht Mundemi” apelon që veprime të tilla humane të shërbejnë si frymëzim edhe për individë e biznese të tjera që kanë mundësi të kontribuojnë për fëmijët në nevojë.