Presidentja e Maqedonisë së Veriut, Gordana Siljanovska-Davkova, vlerësoi se vendi po ecën në drejtimin e duhur dhe se sot është më funksional se dy vjet më parë. Megjithatë, ajo theksoi se korrupsioni, krimi dhe partitizimi vazhdojnë të jenë problemet më të mëdha me të cilat përballet shteti.
Në një intervistë për televizionin “Kanal 5”, ajo tha se vendi po përparon, duke përmendur Planin për Rritje dhe miratimin e paketës së ligjeve për gjyqësorin, të cilat tani duhet të zbatohen në praktikë përcjell INA.
“Besoj se po ecim mirë. Shteti është më funksional se më parë në shumë fusha, por ndryshimet nuk mund të ndodhin brenda natës apo vetëm me miratimin e një ligji. Nevojitet kohë që reformat të japin rezultate”, u shpreh Siljanovska-Davkova.
Ajo theksoi se korrupsioni, krimi dhe partitizimi mbeten plagët më të mëdha të shtetit.
“Shteti ka nevojë për institucione të forta dhe jo për individë të fortë. Aty ku ka partitizim dhe politizim, korrupsioni dhe krimi lulëzojnë më lehtë. Jam e tronditur nga disa prej zbulimeve për atë që ka ndodhur në institucione të caktuara. Është e papranueshme që dikush të mos shkojë në punë dhe megjithatë të marrë pagë”, deklaroi presidentja.
Sipas saj, prioritetet kryesore duhet të jenë mbrojtja e qytetarëve më të cenueshëm, zbatimi i reformave dhe zhvillimi ekonomik.
Ajo theksoi se duhet të vazhdojë lufta serioze kundër korrupsionit dhe krimit, të emërohen njerëzit e duhur në pozitat përkatëse përmes procedurave transparente, të ruhet stabiliteti ekonomik dhe të përshpejtohen reformat që lidhen me Bashkimin Evropian.
Presidentja shtoi se është e rëndësishme të plotësohen vendet vakante në ambasada, ndërsa Kuvendi duhet të funksionojë më mirë, të miratojë ligje cilësore, të mbikëqyrë punën e Qeverisë dhe të bashkëpunojë më ngushtë me sektorin civil.
Në fund, Siljanovska-Davkova u bëri thirrje të gjitha partive parlamentare që mosmarrëveshjet dhe çështjet politike t’i zgjidhin në Kuvend përmes dialogut politik, e jo nëpër konferenca për media apo debate televizive. Sipas saj, institucionet janë vendi ku duhet të zhvillohet debati politik dhe të merren vendimet në interes të qytetarëve.