Ish-deputeti i Partisë Demokratike të Kosovës, Nait Hasani, ka paralajmëruar për pasojat që mund të sjell verdikti i Gjykatës Speciale në raport me ish-krerët e UÇK-së.
Ai ka thënë se nuk do të ketë qetësi në rast se dënohen ish-krerët e UÇK-së.
Hasani në Dpt te Fidani ka thënë se pritshmëritë e tij janë se ata do të lirohen më 16 shtator, por se nëse nuk ndodhë kjo, “do të kallet Kosova”.
“Pritshmëritë e mia janë: lirimi i tyre më 16 shtator. Ata duhet të lirohen. Në të kundërtën, në Kosovë nuk ka qetësi, as s’ka me pasë qetësi. Nuk lejohet asnjë ushtar i Ushtrisë Çlirimtare të Kosovës të dënohet”, është shprehur ai.
Sipas tij, pasojat e një vendimi të tillë do të jenë të mëdha.
“Nuk ka me pasë qetësi. Le ta dinë edhe ndërkombëtarët, le ta dinë edhe gjykata, edhe të tjerët. Ka me u kallë Kosova nëse ata dënohen atje”, ka thënë ai, duke shtuar se nuk do të lejohet që lufta të kriminalizohet.
“Na cenohet liria jonë, shteti ynë, lufta jonë, gjaku i dëshmorëve, dëshmorët, të gjithëve na cenohen me vendimin negativ që merret atje. Prandaj, të dënohet Ushtria Çlirimtare e Kosovës, dënohet shteti i Kosovës”, ka thënë ai.
Dhomat e Specializuar të Kosovës në Hagë kanë njoftuar se vertidiktin e tyre përfundimtarë ndaj ish-krerëve të UÇK-së do t’i shqiptojnë në shtator.
Analisti i njohur nga Shkupi thotë se në prapavijë të prononcimit të ish deputetit të PDK-së vërehet një tendencë për të nxitur protesta dhe kaos në Kosovë me shpresë se në atë mënyrë do të realizojnë ëndërrën për t’u kthyer në pushtet.
“Është e qartë se këtë ëndërr nuk po mund ta realizojnë në mënyrë dekokratike me zgjedhje, sepse populli i Kosovës i ka lexuar”, vlerëson Berisha, duke shtuar se ata që e kanë votuar “Specialen” po mundohen në këtë mënyrë ta heqin fajin nga vetvetja dhe të ja hedhin tjetër kujt, por se nuk do kenë sukses në këto “përpjekje amatoreske”
Ai madje paralajmëron këta seështë mirë të brengosen pak më tepër për vetveten, sepse fati i Kosovës është i sigurt.
“Liria e Kosovës është fituar me shumë sakrifica dhe askush nuk mund t’i nxit qytetarët të kallin vendlindjen e tyre. Unë do të jepja një këshillë tjetër, e kjo është se do të ishte mirë që në rast se dënohen çlirimtarët, ata që e kanë votuar specialen së paku një muaj të largohen nga Kosova. Supozoj e dinë vetë ata pse do të ishte mirë të veprojnë kështu”, porosit Berisha.
Ndryshe edhe kryetari i OVL-UÇK-së, Hysni Gucati, ka deklaruar se pas dy muajsh, Gjykata Speciale në Hagë do të marrë vendimin e saj, i cili mund të ketë pasoja të mëdha për Kosovën.
Në profilin e tij në Facebook, ai ka shkruar se kjo gjykatë prej gati gjashtë vjetësh po u shërben interesave të Serbisë.
“Kjo gjykatë njëetnike po vendos për fatin e shtetit tonë shumetnik dhe, me vendimin e saj, mund t’i rrënojë edhe themelet e shumetnicitetit mbi të cilin është ndërtuar Kosova”, ka shkruar ai.
Në reagimin e tij, Gucati është shprehur se në Hagë po gjykohen ata që, sipas tij, organizuan rezistencën e popullit shqiptar.
“Po gjykohen ata që, me nënshkrimin e Marrëveshjes së Rambujesë, sollën intervenimin e NATO-s dhe koordinuan bombardimin e caqeve serbe. Po gjykohen ata që e shpallën Kosovën shtet të pavarur, shumetnik dhe demokratik”, ka vlerësuar ai, duke shtuar se kjo gjykatë është politike.
“Kjo gjykatë është politike. Edhe vendimi i saj do të jetë politik. Bashkësia ndërkombëtare duhet të jetë e vetëdijshme për pasojat e këtij vendimi. Më 16 shtator, veteranët e UÇK-së, së bashku me çdo shqiptar, do ta presin këtë vendim të bashkuar, në Hagë dhe në çdo qytet të Kosovës”, ka theksuar Gucati.