Qeveria mbetet e përkushtuar ndaj politikave që synojnë mbajtjen e çmimeve të ulëta të derivateve të naftës dhe përmirësimin e standardit të jetesës së qytetarëve, deklaroi sot kryeministri i Maqedonisë së Veriut, Hristijan Mickoski.
Duke komentuar zhvillimet e fundit në Gjirin Persik, përfshirë tensionet mes Shteteve të Bashkuara dhe Iranit, si dhe ndikimin e tyre të mundshëm në tregun ndërkombëtar të naftës, Mickoski tha se Qeveria po ndjek nga afër situatën, pasi ajo mund të reflektohet edhe në çmimet e karburanteve.
“Ne i kemi parasysh të gjitha këto zhvillime. Gjendja e krizës zgjat deri më 20 korrik. Vlerësoj se tashmë janë krijuar kushtet që nga e hëna të kemi sërish ulje të akcizave për benzinën pa plumb dhe për naftën”, deklaroi Mickoski.
Sipas tij, para marrjes së vendimit përfundimtar duhet të mbyllen tregjet dhe të analizohet lëvizja e çmimeve gjatë 15 ditëve të para të periudhës.
“Ne mbetemi të përkushtuar ndaj kësaj politike. Maqedonia e Veriut ka bindshëm çmimet më të ulëta të karburanteve në rajon. Dikush mund të thotë se pagat në Gjermani janë më të larta, por çmimi i karburanteve përcaktohet në bursat ndërkombëtare. Ne dhe Gjermania furnizohemi nga i njëjti treg. Nuk kemi burime nafte në oborret tona për të mbushur rezervuarët e automjeteve”, tha ai.
Mickoski shtoi se çmimet e karburanteve në vendet fqinje janë dukshëm më të larta, duke përmendur se në Shqipëri ato janë rreth 70 për qind më të shtrenjta, në Greqi pothuajse dyfish më të larta, ndërsa në Serbi rreth 50 për qind më të larta.
“Këto janë rezultatet e politikave të kësaj Qeverie, të cilat synojnë të sigurojnë një standard më të mirë jetese për qytetarët”, përfundoi Mickoski./INA/