Moderatorja e emisionit “Nëpër qytet me Kikin”, Kiki Mukaetova, përmes një postimi në rrjetet sociale ndau dëshminë e saj personale për dhunën mes bashkëmoshatarëve që përjetoi si fëmijë, duke dërguar një mesazh të fortë pas rastit të fundit të dhunës mes nxënësve në Aerodrom.
Ajo tregon se si fëmijë ishte viktimë e dhunës së rëndë, nga e cila iu thye hunda dy herë, krahu dhe për vite me radhë u përball me pasojat psikologjike.
“Dy herë hundë e thyer, krah i thyer, një mal me trauma. Vite të tëra punë me psikologun dhe ende më kapin mornicat. Edhe sot, në moshën 18-vjeçare, e kujtoj frikën me të cilën shkoja në shkollë. Isha vetëm 10 vjeçe dhe çdo ulje në bankën e shkollës ishte një makth”, shkroi Mukaetova.
Ajo shton se pasojat nuk i ndjeu vetëm personalisht, por edhe familja e saj.
“Për motrat e mia u krijuan grupe kundër tyre në rrjetet sociale. Edhe vëllai im, në moshën shtatëvjeçare, kaloi një traumë”, theksoi ajo.
Në postimin e saj, Mukaetova reagoi ashpër edhe ndaj faktit që dhuna sot jo vetëm që ushtrohet, por edhe filmohet dhe shpërndahet në rrjetet sociale.
“Deri kur do të shohim fëmijë që rrahin, poshtërojnë, e tani edhe incizojnë? Sa i palumtur duhet të jesh për të bërë diçka të tillë? Ju që nxisni nga anash ndërsa një fëmijë rrihet dhe poshtërohet, a mendoni vërtet se jeni të fortë?”, pyeti ajo.
Në fund, moderatorja bëri thirrje për sanksione më të ashpra dhe përgjegjësi më të madhe.
“Na duhet dëshpërimisht përgjegjësi. Dënimet më të rrepta – si për fëmijët që ushtrojnë dhunë, ashtu edhe për prindërit kur neglizhojnë përgjegjësinë e tyre. Si shoqëri, harrojmë shumë shpejt. Por fëmijët që e kanë përjetuar këtë tmerr nuk e harrojnë kurrë”, përfundoi moderatorja e emisionit “Nëpër qytet me Kikin”, përcjell Zhurnal.mk.
