120.000 shkelje trafiku në pesë muaj janë regjistruar në sistemin “Safe City”. Ministri i Brendshëm Pançe Toshkovski, tha se, që nga vendosja e kamerave, është regjistruar një ulje prej rreth 40% e aksidenteve, ndërsa edhe numri i viktimave është më i ulët krahasuar me vitin e kaluar.
“Prej 2 shkurtit, në 5 muajt e parë të vitit 2026, është regjistruar ulje e aksidenteve të trafikut për rreth 40 për qind, respektivisht kanë humbur jetën 34 persona, krahasuar me 55 për të njëjtën periudhë vitin e kaluar. Deri më 22 qershor 2026, përmes kamerave janë regjistruar 120.000 shkelje, nga të cilat 95 për qind janë për tejkalim të shpejtësisë së lejuar”, tha Pançe Toshkovski,Ministër i MPB-së.
Toshkovski tha se deri në fund të vitit sistemi “Safe City” do të zbatohet plotësisht në të gjithë vendin.
Duke raportuar për punën e tij dy vjeçare si ministër i brendshëm, Toshkovski u mburr me atë se Maqedonia ka nivelin më të ulët të kriminalitetit në 20 vitet e fundit, ndërsa është rritur me 69% zbulimi i autorëve të veprave penale. Po ashtu janë zbuluar më shumë se 30 grupe të organizuara kriminale.
“Në fushën e korrupsionit janë shkatërruar gjashtë grupe të tilla, me ç’rast janë kallëzuar penalisht 146 persona dhe 18 persona juridikë. Janë zbuluar rreth 500 vepra penale, ndërsa numri i të dyshuarve tejkalon 1.000”, tregoi Pançe Toshkovski, Ministër i MPB-së.
Toshkovski tha se janë zbuluar dhe parandaluar rrjetet ndërkombëtare të trafikut të drogës, ku janë zbuluar mbi 1.600 vepra penale me rreth 1.900 të dyshuar dhe janë sekuestruar rreth 6,2 tonë lloje të lëndëve narkotike./Alsat.mk.