Profesor dhe filozofi i njohur, Blerim Latifi, ka reaguar me tone të ashpra përmes një postimi në rrjetet sociale, duke adresuar atë që ai e quan një “paradoks të ndërgjegjes njerëzore” sa i përket reagimeve të shqiptarëve të Luginës së Preshevës.
Përmes një analize publike, Latifi ka vënë në dukje kontrastin sipas tij të pakuptimtë mes reagimit ndaj shtypjes kombëtare që po u bëhet në Serbi dhe gatishmërisë për të protestuar në Shqipëri.
“Shqiptari i Luginës së Preshevës rri gatitu para xhandarit serb. Nuk arrin të organizojë as një miniprotestë kundër spastrimit të heshtur etnik që Serbia po e zbaton përmes pasivizimit të adresave dhe masave të tjera diskriminuese, të cilat e kanë goditur rëndë të drejtat politike e qytetare të shqiptarëve atje.
Por ja që merr turrin të shkojë në Tiranë për të protestuar kundër Edi Ramës dhe kundër një investimi amerikan në bregdetin shqiptar. Dhe këtë e bën pavarësisht faktit se qeveria shqiptare është e vetmja që, të paktën në kanalet diplomatike perëndimore, ka ngritur vazhdimisht zërin për çështjen e shqiptarëve të Preshevës.
Ndërgjegja njerëzore sikletoset nga paradokse të tilla shqiptarësh.”, ka shkruar Latifi.