Thirrja e Zijadin Selës për një tryezë të përbashkët të partive parlamentare të shqiptarëve në Maqedoni është një mision i pamundur për ish-bashkëpartiakun Arben Taravarin.
Sipas liderit të njërit prej disa krahëve të Aleancës për Shqiptarët (ASH), kushdo që të thërrasë një gjë të tillë, tjetri nuk do ta pranojë.
“Do të ishte shumë mirë të bëhej kjo, por është mision i pamundur. Kush nuk do ta pranonte? Nëse thërret VLEN-i, BDI-ja dhe ASH-ja nuk do të pranojnë. Nëse thërret ASH-ja, VLEN-i nuk do ta pranojë”, deklaroi Taravari.
Ai mendon ndryshe. Sipas tij, dy kryeministrat e Shqipërisë dhe Kosovës, Edi Rama dhe Albin Kurti, duhet t’i mbledhin liderët e partive shqiptare nga Maqedonia e Veriut në një takim të përbashkët, ku do të definoheshin „vijat e kuqe“ në mënyrë që, siç tha ai, të mos ketë regres për të drejtat e shqiptarëve.
“Unë këtë e shoh ndryshe. Mendoj se problemi i problemeve të shqiptarëve në Maqedoni janë dy kryeministrat shqiptarë. Mendoj se reflektimi kryesor duhet të vijë nga dy kryeministrat. Z. Kurti dhe z. Rama e kanë për obligim t’i ftojnë të gjithë liderët e partive politike në një drekë të përbashkët. Atje duhet të vendosen vijat e kuqe për të drejtat që shqiptarët duhet të paktën t’i mbajnë, në mënyrë që të mos kemi hapa prapa”, deklaroi Taravari në emisionin “Click Plus”.(INA)