Tre ministrat në detyrë, Xhelal Sveçla, Artane Rizvanolli dhe Dimal Basha kanë qëndruar sot në veri të vendit ku kanë marrë pjesë në heqjen e një tabele të shkruar në cirilikë në ambientet e një objekti të hekurudhës që ndodhet në Zveçan.
Aty është vendosur edhe flamuri i Kosovës dhe tabela në gjuhën shqipe.
Ministri në detyrë i Infrastrukturës, Dimal Basha tha se stacionet hekurudhore në veri, tash e tutje do të operohen nga Ndërmarrja Hekurudhore Infrakos.
“Jemi këtu, sepse siç e dini këtu kanë vazhduar të operojnë strukturat paralele të Serbisë dhe ne tani kemi vendosur institucionet tona. Është Infrakos-i që tani do ta marrë stacionin hekurudhor këtu në Zveçan dhe gjithashtu tri stacione të tjera [në veri, v.j]”, tha ai.
Edhe ministrja e Ekonomisë, Artane Rizvanolli deklaroi se Infrakosi është një nga ndërmarrjet që merr nën kontroll asete në veri.
“Ndërmarrjet tona publike, gjithnjë e më shumë po shtrijnë shërbimet e tyre dhe po marrin përsipër asetet e tyre në të gjitha komunat e vendit. Infrakos-i sot i shtohet kësaj listeje, duke marrë nën kontroll stacionet hekurudhore”, tha ajo.
Siç shkruan portali nga veriu, Kossev, në vendngjarje ndodhej një punëtor, i cili, pasi mbërritën autoritetet e Kosovës, mori sendet e tij dhe u largua nga ambientet e stacionit.