Kapiteni i Kosovës, Amir Rrahmani, ka bërë një deklaratë që ka shkaktuar reagime të mëdha te tifozët shqiptarë dhe ata të Napolit.
Mbrojtësi kosovar, i cili prej vitesh është një nga shtyllat kryesore të SSC Napoli, u shpreh se pas gjithë kohës së kaluar në Itali, Napoli tashmë ndihet më shumë si shtëpia e tij sesa Kosova, transmeton Klankosova.tv.
“Tifozët e vërtetë janë gjithmonë pranë nesh, pavarësisht rezultateve pozitive apo negative. Pas kaq shumë vitesh në Napoli, mund të them se shtëpia ime e parë nuk është më në Kosovë, por këtu”, deklaroi Rrahmani.
Ai foli edhe për arritjen personale me fanellën e klubit italian, duke potencuar rëndësinë e çdo paraqitjeje me skuadrën napolitane.
“300 paraqitje për Napolin? Sa më shumë t’i bëj, aq më mirë, si për klubin ashtu edhe për mua, sepse kjo do të thotë se jam i aftë”, shtoi kapiteni “Dardan”.