Analisti Agim Baçi, i ftuar në “Quo Vadis” të moderatores Pranvera Borakaj, ka komentuar situatën e sotme në Kuvend, ku sërish ka pasur përplasje mes opozitës dhe mazhorancës.
Shkak këtë herë u bë kërkesa e Taulant Ballës për të mbajtur 1 minutë heshtje për “Heronjtë e 2 prillit”, çka solli reagimin e opozitës.
Sipas Baçit, opozita mund t’i kërkonte llogari Ruçit kur ishte kryetar Kuvendi, nuk kishte pse ta bënte sot.
Pjesë nga biseda:
Borakaj: Si e shikon atë që ndodhi në parlament?
Baçi: Beteja politike duhet të bëhet. Opozita duhet të shfrytëzojë hapësirat parlamentare. Nuk e kuptova pse e quajti provokim. Ndoshta kishte të drejtë sa kohë ishte zoti Ruçi kryetar Kuvendi. Por Taulant Balla e kushdo tjetër…
Borakaj: Si trashëgimtar?
Baçi: Si trashëgimtar? A ju kemi kërkuar atyre trashëgimtarëve të kërkojnë falje? Unë isha kurioz si do të shpjegohej. Nuk e gjykoj dot, sepse ne duhet të gjykojmë aktet publike. Ne kemi abuzim shumë të madh me heronjtë, duket sikur i duam vetëm të vdekur. Unë e kam ende para syve ngjarjen e 2 prillit. Ishte një tronditje e madhe, sapo kishim dalë nga zgjedhjet e marsit. Asnjëherë nuk u zbardh e vërteta. Duket sikur politika as nuk ka interes ta zbardhë. Unë mendoj se parlamenti dhe opozita aty duhet të jenë. Opozita nuk humb rast për të bërë politikë, ndërkohë që janë momente kyçe. Ishin 3 interpelanca sot, duhet të merrnin më seriozisht sigurinë kombëtare. Fat i madh që jemi në NATO. Ne kemi parë sa herë opozita bën sherr, mazhoranca kalon projektligje për tre minuta.