Grupi Parlamentar i Partisë Demokratike ka depozituar një kërkesë pranë Sekretariatit për Procedurat, Votimet dhe Etikën ku kërkon përjashtimin nga Kuvendi për 60 ditë të kreut të Grupit Parlamentar të PS-së Taulant Balla. PD e akuzon për sjellje të papranueshme dhe shkelje të rënda të etikës parlamentare gjatë seancës së djeshme parlamentare.
Sipas demokratëve, Balla ka përdorur gjuhë fyese, kërcënuese dhe diskriminuese ndaj deputetes Elda Hoti, duke cenuar dinjitetin dhe sigurinë e saj.
Demokratët pretendojnë se situata u tensionua në momentin kur Hoti kërkoi fjalën, duke kundërshtuar faktin se nuk po i jepej radha për të folur. Sipas tyre, në këtë moment Balla është ngritur dhe i është drejtuar me tone fyese dhe kërcënuese.
Në kërkesë përmendet edhe një tjetër incident gjatë së njëjtës seancë, ku Balla akuzohet se ka përdorur gjuhë jo parlamentare ndaj deputetit Fatmir Mediu, duke i cenuar dinjitetin në mënyrë publike.
Po ashtu, në dokument theksohet se kjo nuk është hera e parë që Balla akuzohet për një sjellje të tillë. Sipas PD-së, në një seancë të mëparshme më 5 mars 2026, ai ka përdorur gjuhë fyese dhe me përmbajtje seksiste ndaj deputetes Albana Vokshi.
Në përfundim, demokratët theksojnë se përmes kësaj kërkese synojnë jo vetëm ndëshkimin e Ballës, por edhe parandalimin e rasteve të ngjashme në të ardhmen, duke mbrojtur standardet e etikës dhe komunikimit në Kuvendin e Shqipërisë.