Politika shqiptare po punon sërish për një reformë të re zgjedhore, por a e kanë seriozisht këtë herë?
Kjo ishte pyetja e drejtuar nga moderatorja Pranvera Borakaj këtë të enjte në studion e “Quo Vadis” në Vizion Plus.
I ftuar në studio, eksperti zgjedhor Andon Kume tha se të mendosh që këtë herë e kanë seriozisht, duke pasur parasysh reformat e kaluara, do të thotë të gënjesh veten.
Pjesë nga biseda:
Borakaj: Të duket sikur ka vullnet të mirë politika këtë herë për Reformën Zgjedhore?
Kume: Të thuash që kjo është serioze, pasi ke një eksperiencë shumëvjeçare të reformave të tjera, do të thotë të gënjesh veten.
Borakaj: Ka pasur presion ndërkombëtar.
Kume: Gjithmonë ka pasur presion, por këtë herë është më i madh. Edhe raporti i OSBE thotë qartë se duhet të fillojë një reformë gjithëpërfshirëse.
Borakaj: Vetëm gjithëpërfshirëse nuk është.
Kume: Pse reformat janë kaq të debatueshme? Sepse ato trajtojnë procesin zgjedhor. Prandaj ka kaq shumë interes mbi proceset, sepse çdo parti politike do të përdorë në maksimum mundësitë që i jep ligji për të përfituar sa më shumë. Reforma zgjedhore që po kërkohet të bëhet, siç është ideja e uljes së numrit të deputetëve, është mëse normale.