Kryetari i PD Sali Berisha shfrytëzoi mbledhjen e grupit parlamentar, për të lajmëruar se aksioni i opozitës në kuvend do të fokusohet te beteja kundër oligopoleve. Sipas Berishës oligopolet janë sot problemi më i madh në tregun shqiptar.
“Gjatë këtyre javëve, me të drejtë, jemi ndalur tek oligopoli i hidrokarbureve, i naftës. Por, në tregun shqiptar nuk është ky i vetmi oligopol. Oligopol në tregun shqiptar është edhe kafshata. Oligopol është sheqeri. Është mishi. Oligopolet pra janë mamuthët e tregut”, tha Berisha.
Sipas Berishës oligopolet janë arsyeja pse shqiptarët paguajnë sot më shtrenjte jo vetëm naftën, por edhe ushqimet.
“Pse Shqipëria, me fuqinë blerëse më të ulët në rajon, ka çmime mesatare më të larta se BE? Është në detyrimin madhor të PD të ndërmarrë një luftë frontale në mbrojtjen më të vendosur të interesave të qytetarëve. Ndaj dhe aktualisht problem madhor është nafta, se është i mprehtë, por duhet të jemi të vërtetë, po kaq problem është kafshata. Sheqeri, orizi, mishi, të gjitha këto janë oligopole”, shtoi Berisha.
Sipas kryetarit të PD këto biznese i imponohen qeverisë në kurriz të qytetarëve.
“Oligopolet në Shqipëri nga një analizë arrijnë një veprimtari antitreg, antiqytetar. Kjo sepse peshojnë në kandar dhe blejnë me lecka nga Edi Rama e poshtë”, tha ai.
Në mbledhjen e grupit Berisha shpjegoi se kjo betejë nuk është kundër biznesit, por PD do të bëjë gjithçka që të mbrojë qytetarët.