Ish-kryeministri Sali Berisha në një konferencë për mediat ka reaguar ashpër pas arrestimit të katër shqiptarëve në Beograd, duke dënuar veprimin e autoriteteve serbe si një akt racizmi dhe urrejtjeje ndaj shqiptarëve.
Berisha kërkoi lirimin e menjëhershëm të të rinjve, ndërsa i krahasoi veprimet e presidentit serb, Aleksandër Vuçiç, me diktatorë si Kim Jong Un dhe udhëheqësit fetarë të Teheranit.
Lexo edhe :
Related Posts
Kreu i PD-së paralajmëroi protesta para ambasadës së Beogradit në Tiranë nëse shtetasit shqiptarë nuk lirohen.
Berisha: Dua të dënoj me forcën më të madhe arrestimin e katër të rinjve shqiptarë në Beograd me urdhër të Aleksandër Vuçiç, kreut të organizatës kriminale të Beogradit. Të rinjtë shqiptarë janë arrestuar për fajin e vetëm se njëri prej tyre ka postuar në Facebook apo Instagram një flamur shqiptar me portretet e Ismail Qemalit dhe Isa Boletinit. Dhe sipas organeve të Beogradit, ka thënë edhe fjalë të papërshtatshme për Serbinë. Ky akt i shëmtuar e barazon Aleksandër Vuçiçin me Kim Jong Un-in, me Ajatollahët e Teheranit dhe tregon një racizëm të papërmbajtur dhe urrejtje ndaj shqiptarëve.
Dënoj me forcën më të madhe këtë akt të shëmtuar, të pashembullt dhe kërkoj lirimin e menjëhershëm të të rinjve shqiptarë. Sikundër, i bëj thirrje komunitetit ndërkombëtar të dënojë me forcë këtë akt që tejkalon të gjitha limitet, që mund të ndodhë dhe njëherë vetëm në diktaturat më të zeza. Katër tifozët nuk kanë kryer asnjë akt përveçse kanë postuar në rrjetin e tyre social status me flamur dhe kanë thënë mendimet e tyre për Serbinë, të cilat sipas Vuçiçit qenkan të ndaluara në territorin e Serbisë të thuash një fjalë të keqe për Serbinë.
Kjo është unike në botë. Ky është turp! Ndaj dhe, kërkoj lirimin urgjent, përndryshe opozita do marrë hapat e veta të protestave të fuqishme para përfaqësisë së Beogradit në TIranë. Ata duhet të lirohen, menjëherë!
Ditën e sotme katër shtetas shqiptarë, A.S, 37 vjeç, E.V, 42 vjeç, E.G, 48 vjeç dje A.C, 21 vjeç u arrestuan nga policia në Serbi. Lajmi u konfirmua nga ministria e Punëve të Brendshme serbe.
Ata akuzohen për “nxitje të urrejtjes dhe intolerancës kombëtare, racore dhe fetare”. Sipas ministrisë së Brendshme serbe, një prej të ndaluarve kishte publikuar një video në rrjetet sociale, ku shfaqet me një bluzë me hartën e “Shqipërisë së Madhe”, duke udhëtuar me një automjet “Audi” së bashku me tre personat e tjerë. Të ndaluarve u është komunikuar masa e paraburgimit deri në 48 orë, pas së cilës do të dalin para Prokurorisë Publike në Beograd.