Eksperti ndërkombëtar Ilir Aliaj e ka cilësuar si qasje me dy standarde vendimin e sotëm të Parlamentit të Shqipërisë, i cili me 79 vota pro shpalli Iranin financues të terrorizmit.
I ftuar në “Quo Vadis” në Vizion Plus, të moderatores Pranvera Borakaj, Aliaj tha se fillimisht duhet rënë dakord se çfarë nënkuptojmë me terrorizëm, ndërsa solli në kujtesë masakrat izraelite ndaj fëmijëve, grave dhe të moshuarve në Gaza.
“Çfarë do të thotë fjala terrorizëm? E kanë votuar zotërinjtë dhe zonjat atje, dakord. Unë jam i ndërgjegjshëm që nuk duhet të ndërhyjmë në vendimmarrjen e deputetëve. Terrorizëm është kur unë them terrorizëm dhe, kur nuk dua unë, nuk është? Kjo është pikëpyetja e madhe. A ishte terrorizëm në qershorin e vitit 2025 vrasja e disa qytetarëve iranianë pas sulmeve izraelite? A ishte terrorizëm apo jo? A ishte terrorizëm vrasja e fëmijëve në Gaza?
Nëse ne biem dakord për këto gjëra, atëherë mund të flasim për këtë që ka bërë sot Kuvendi i Shqipërisë. Askush nuk ka thënë asgjë, përveç Izraelit, me një kryeministër që është i kërkuar nga Gjykata e Hagës, që ka thënë: ‘Bravo Shqipëria’. Duhet të biem dakord të dimë se çfarë do të thotë terrorizëm.
Vjet, në qershor, janë vrarë disa njerëz në Iran, pasi shteti iranian ishte në negociata direkte me SHBA. Izraeli ndërhyn në mes të negociatave, sulmon Iranin dhe vriten disa njerëz. Është tjetër histori nëse ata janë të mirë apo të këqij. Nëse i hyjmë historisë, askush nuk e thotë sot atë që ka ndodhur në Sabra dhe Shatila në vitin 1982, ku janë vrarë fëmijë dhe pleq; kanë hyrë forcat izraelite dhe i kanë prerë në fyt. Kur filloi gjyqi për terrorizëm ndaj Ariel Sharon, papritur ai ra në koma”, tha Aliaj.