Eksperti ndërkombëtar Marlind Laçi, i ftuar në “Quo Vadis” të moderatores Pranvera Borakaj në Vizion Plus, analizoi situatën në Lindjen e Mesme.
Ai theksoi se Irani është mburoja e parafundit për krijimin e “Izraelit të Madh”. Sipas tij, nëse bie Irani, do të kemi një përballje finale mes Izraelit dhe Turqisë.
Pjesë nga biseda:
Laçi: Interesant është se ajo që vritet e para në luftë është e vërteta. Tani çdokush mund të marrë një video dhe të dërgojë mesazhin e caktuar. Vërtet, shtëpia dhe zyra e Netanyahut është goditur me raketa, ky është një fakt, por nuk dihet vërtet fati i Netanyahut dhe nëse videoja me ambasadorin amerikan është e krijuar me IA.
Borakaj: Por kishte dialog të gjatë.
Laçi: Ambasadori është me prirje të forta sioniste; ky i ka dhënë të drejtën e Izraelit të Madh. Kemi shkatërrimin e Egjiptit, Sirisë, Libanit, Turqisë dhe Irakut. E gjithë kjo luftë mbart në vetvete një luftë fetare mes sekteve.
Borakaj: A është Irani duke i goditur këto vende?
Laçi: Irani është pengesa e parafundit, pasi pengesa e fundit është Turqia.
Borakaj: Cili është reagimi i Erdogan?
Laçi: Është i qartë: dënon sulmin e Izraelit ndaj Iranit, por dënon edhe sulmet e Iranit ndaj vendeve të Gjirit. Janë Emiratet që kanë financuar grushtin e shtetit në Egjipt ndaj Sisit, në Turqi ndaj Erdoganit në vitin 2016, në Sudan, si dhe kanë ndikuar në islamofobinë në BE. Për këtë arsye edhe Emiratet po pësojnë goditje të forta. De facto, Izraeli ia ka dalë të krijojë Izraelin e Madh, pasi të gjithë drejtuesit në vendet e Gjirit janë marioneta në duart e Netanyahut. Jashtë loje ka dalë aset i tyre në Turqi, i cili është domen turk. Nëse Irani kapitullon, atëherë mund të themi se do të kemi përballje për jetë a vdekje mes projektit të Izraelit të Madh dhe Turqisë, jashtë gjeografisë së tyre.
Borakaj: Referuar armatimeve, mendon se mund të zgjasë gjatë?
Laçi: SHBA është vendi me kapitalin më të madh ushtarak në botë. Irani ka zhvilluar në një masë të konsiderueshme programin e raketave hipersonike. Sistemet e mbrojtjes kanë dalë pjesërisht jashtë loje. “Iron Dome” është i cenueshëm ndaj këtyre goditjeve dhe sigurisht nuk dimë shifrën e këtyre raketave. Nëse ka deri në 1 milion raketa, siç pretendon Garda Revolucionare, do të kemi një luftë 1-vjeçare ose 2-vjeçare. Mund të them se ky konflikt nuk do të mbyllet për aq kohë sa nuk shohim fraktura ndaj regjimit të Ajatollahut.