Juristi Kreshnik Myftari ka sqaruar këtë të martë në Quo Vadis nismën e Gjykatës së Lartë për ndryshimin e masës “arrest me burg”.
I pyetur nga moderatorja Borakaj se çfarë po synohet të ndryshohet, Myftari tha se synohet që të mos jepet menjëherë masa “arrest me burg” për veprën penale të shpërdorimit të detyrës.
Por sipas tij, kjo është e vështirë të interpretohet, pasi kompetenti për të kërkuar masën ndaj të akuzuarit është prokurori.
Pjesë nga biseda:
Borakaj: Ndërhyrja e Gjykatës së Lartë për masën “arrest me burg”?
Myftari: Ajo që nuk e bëri dot qeveria, sepse nuk u lejua nga BE-ja, po bëhet nga Gjykata e Lartë. Pra, nëse vendoset ky lloj standardi, është e pamundur për t’u interpretuar rrethana e sigurimit. Sepse rrethanat e sigurimit njihen vetëm nga prokurori. Është ai kompetenti që di se çfarë mase i përshtatet këtij rasti. Për ato rrethana që janë të panjohura, shprehet gjykata.
Kikia: Çfarë parashikon konkretisht?
Myftari: Që për shpërdorim detyre të mos vendoset “arrest me burg”. Shpërdorimi i detyrës ka tre pasoja: e para, e barabartë me vjedhjen; e dyta, dëmtimi i interesave të shtetasve; dhe e treta, dëmtimi i interesave shtetërore. Të treja nuk kanë të njëjtën vlerë. Shpërdorimi i detyrës është formë specifike e vjedhjes.