Kreu i qeverisë Edi Rama, gjatë një takimi me banorët e Librazhdit pas inspektimit të punimeve në aksin e dëmtuar Librazhd-Prrenjas, komentoi edhe protestat e opozitës. Sipas tij, këto protesta kanë për qëllim “të nxijnë” fytyrën e Shqipërisë nëpër botë, me qëllim që të krijohet përshtypja se vendi ynë është i zhytur në korrupsion. Por shefi i qeverisë theksoi se korrupsioni nuk është luftuar kurrë më parë siç po luftohet tani.
Rama: E vëreta është që gjithë çfarë bëhet në ato pocaqi protesta, që janë s jashtëderdhje njerëzore në Bulevard…bëhet vetëm për fotografitë që prodhohen nga zjarret dhe nga dhuna për t’u çuar nëpër botë. Për të thënë ja kjo është Shqipëria, mos shkoni në Shqipëri, mos bëni turizëm, mos investoni se Shqipëria është e zhytur në korrupsion e bla bla bla. Si qenka e zhytur në korrupsion kur korrupsioni po luftohet më shumë se çdo herë tjetër.
Edhe rastet që trajtohen dhe janë trajtuar janë 85% raste që i përkasin mandatit të parë dhe të dytë. Në gjithë ato raste 10 janë me akuzën e korrupionit. Shumë më ndryshe e vërteta nga sa tregohet. A kemi ne probleme me korrupsionin? Patjetër që kemi, kush nuk ka. Por kush e lufton tjetër korrupsionin në këtë rajon siç po e luftojmë ne? Askush. Nuk kemi pasur ne kurrë drejtësi të paavrur se po të kishim do ishte luftuar më parë korrupsioni në nivelet më të larta.
Një koment e kishte edhe për liderin e Partisë Demokratike, Sali Berisha të cilin e quajti “mallkim” për vendin.
Rama: Për sa kohë jemi atë mallkim e komunizmit dhe historisë tonë akoma vërdallë, si hije e zezë që sjell vërdallë një tufë qorrash e kemi dhe këtë taksirat nuk kemi çfarë bëjmë. Nuk e zgjedhim ne në demokraci kundërshtarin, e zgjedhin të tjerë. S’ka problem, ne do të bëjmë gjërat që kemi planifikuar. Shqipëria vetëm do të shkojë përpara, do ta çojmë ne, nuk kthehet më mbrapa.