Përshkallëzimi i konfliktit në Lindjen e Mesme është tema e kësaj të martë në emisionin QUO VADIS në Vizion Plus.
Gazetari Egon Loli tha se ekzistojnë disa skenarë për mënyrën se si mund të evoluojë situata politike në Iran.
Sipas tij, skenari i parë parashikon që Garda Revolucionare të vazhdojë të mbajë kontrollin e pushtetit deri në mbledhjen e këshillit përkatës.
Loli shtoi se skenari i dytë është që qytetarët të shfrytëzojnë momentin për të kërkuar përmbysje të regjimit aktual.
Por, gazetari e konsideron si më të mundshëm një skenar të tretë, që lidhet me interesat strategjike të Netanyahu.
Sipas tij, Izraeli mund të synojë jo një fitore të qartë të njërës palë, por një gjendje destabiliteti të zgjatur në Iran dhe rajon.
Pjesë nga biseda:
Borakaj: Çfarë ndryshon pas vdekjes së Khameneit?
Loli: Për mua, si Irani ashtu edhe Izraeli janë faktorë destabiliteti. Ka disa skenarë që përfliten. Së pari, është që Garda Revolucionare do të vazhdojë deri sa të mblidhet këshilli dhe të zgjidhet Ajatollahu i ri.
Borakaj: Kush e ka pushtetin tani në dorë?
Loli: E ka Garda Revolucionare. Një skenar është që ajo të vazhdojë ta mbajë pushtetin. Një skenar tjetër është që të ndodhë e kundërta, që qytetarët ta shohin veten në epërsi dhe të ndodhë përmbysja. Por edhe këtu lind pikëpyetja se kush do të vijë në pushtet. Skenari i tretë, që unë e shoh si më të mundshëm fatkeqësisht, është ai që Netanjahu bën thirrje që asnjëra nga palët të mos ketë epërsi deri sa të vendoset situata. Netanjahu u ka bërë thirrje grupeve të ndryshme brenda iranianëve që të dalin dhe të marrin në dorë pushtetin. T’u bësh thirrje grupeve etnike ndikon edhe në shtete të tjera të rajonit.
Faktori i vetëm që i shërben ky destabilitet është Izraeli. Izraeli nuk do një fitore të qartë, por një konflikt dhe destabilitet permanent. Izraeli ka objektiv strategjik të jetë vendi dominues në të gjithë rajonin. Izraeli është shteti që mbështetet më shumë nga SHBA.
/vizionplus.tv