“Lindja e Mesme në flakë, sa zgjat?”, kjo ishte tema e diskutimit këtë të martë në studion e “Quo Vadis” të moderatores Pranvera Borakaj në Vizion Plus.
Ish-ushtaraku Arben Çuku, i ftuar në studio, theksoi se nga ana ushtarake ky operacion i SHBA-së dhe Izraelit kishte një efikasitet shumë të lartë për shkak të të dhënave të siguruara nga inteligjenca.
I pyetur se kur mund të mbarojë kjo luftë, Çuko tha se kjo varet nga municionet që disponojnë të dy krahët, në njërin Irani e në krahun tjetër SHBA dhe Izraeli.
Pjesë nga biseda:
Borakaj: Ishte e pritshme?
Çuko: Çdo operacion ushtarak nis me analizimin e të dhënave të inteligjencës. Në këtë drejtim SHBA dhe Izraeli kanë shkëlqyer.
Borakaj: Operacion ekselent.
Çuko: Sigurimi i informacionit të saktë. Nga ana luftarake, ato 60 sekondat që përmendët ju janë vetëm fillimi. Vazhdimi i këtij konflikti do të varet nga objektivat politikë të SHBA-së, nga vullneti i tyre, por do të varet edhe nga qëndrueshmëria e palës iraniane. Nga ana ushtarake, kjo gjë do të varet nga rezervat e municioneve iraniane dhe të krahut amerikan dhe izraelit. Nga krahu iranian, nga sasia e raketave balistike që do të ketë; nga krahu amerikan dhe izraelit, nga raketat kundërajrore. Mirë do të ishte që të mbaronte ky konflikt për katër javët që thotë Trump.