Kreu i Lëvizjes Demokratike, Izet Mexhiti tha se me shkarkimin e Kryesisë Qendrore të Lëvizjes Besa ka nisur procesi i shkrirjes së koalicionit në parti politike, përcjell TV21. Mexhiti tha se pret që të gjitha partitë politike në koalicion, përfshi Lëvizjen Demokratike, ta bëjnë të njëjtin veprim.
“Tashmë ka nisur, me vendimin e Besës mendoj se ka nisur ai proces dhe po vijon. Në periudhën e afërt që vijon, do të ketë njoftim para opinionit. Të njëjtën do ta bëjnë edhe partitë e tjera politike brenda në VLEN, duke filluar nga LD-ja ime”, tha Mexhiti.
Në lidhje me atë se kush do të jetë kryetar i partisë, Mexhiti tha se ende po debatohet por se një nga idetë kreative është ajo e bashkëkryetarëve.
“Ideja e bashkëkryetarëve dmth është një prej ideve kreative të cilat ndoshta nuk janë karakteristike për këtë nën qiell, mirëpo i njeh bota demokratike. Është vlerë evropiane. E kemi edhe në Republikën e Kosovës. Është Lëvizja Guxo. Mirë po ka edhe modele të tjera. Po debatohet me argumente pro dhe kontra”, theksoi Mexhiti.