Një incident ka ndodhur sot në stadiumin e fshatit Dobërshan të Kumanovës, gjatë ndeshjes miqësore mes GFK Kumanovo (Liga e Tretë-Veri) dhe Bashkimi 1947 U18, që ka sjell edhe ndërprerjen e ndeshjes, shkruan Open-TV.
Sic njoftohemi nga sekretari i KF Bashkimi 1947, Faton Beluli, incidenti ka ndodhur në çastet e fundit të pjesës së parë, kur tifozët e skuadrës vendëse “Kumani”, filluan me fyerje dhe brohoritje antiqshqiptare, në atë çast përfaqësues të Bashkimit 1947-U18 kanë kërkuar nga vendësit që të ndalin fyerjet e tifozëve të tyre, ose në të kundërtën do të ndërpresin lojën.
Situatën e tillë e kanë shfrytëzuar rreth 30-40 tifozë “Kumani” të cilët janë vërsulur në drejtim të ekipit të Bashkimit 1947, ku më së keqi ka kaluar sekretari i Bashkimi 1947, Faton Beluli, i cili pas shpine është goditur me një mjetë të fortë.
“Po, sot ka ndodhur një incident i padëshiruar në Dobërshan. Tifozët ‘Kumani’, të Kumanovës, na fyen dhe na shanë me fyerjet e tyre të zakonshme. Ne kërkuam nga GFK Kumanovo që të ndalen këto fyerje ose po e ndërpresim lojën. Deri sa vazhdonim bisedimet unë u sulmova nga mbrapa me një mjet të fortë dhe më pas nuk pati kushte për vazhdimin e lojës. Të them të drejtën lojtarët e GFK Kumanovo na kërkuan falje për atë që ndodhi, sepse në teren ishte loja e qetë nga të dyja palët”, rrëfen ngjarjen për Open-TV, sekretari i KF Bashkimi 1947, Faton Beluli.