Është gjetur zgjidhje për rrugën “Cvetan Dimov” në Çair, pasi sot u miratua propozim-vendimi për vendosjen e bashkëpunimit ndërkomunal ndërmjet Qytetit të Shkupit dhe Komunës së Çairit, për realizimin e këtij projekti të rëndësishëm infrastrukturore që përfshin hartimin e dokumentacionit projektues, ndërtimin, rindërtimin dhe mirëmbajtjen e rrugës “Cvetan Dimov”, nga kryqëzimi me bulevardin “Nikolla Karev” deri te kryqëzimi me rrugën “Xhon Kenedi”.
Vlera e përgjithshme e projektit arrin 150 milionë denarë me TVSH, të siguruara nga Buxheti i Qytetit të Shkupit dhe të planifikuara për realizim në vitet 2026–2028.
Këshilltarët e VLEN-it në Qytetin e Shkupit thonë se ky vendim përfaqëson një hap konkret drejt përmirësimit të infrastrukturës rrugore; rritjes së sigurisë në komunikacion; lehtësimit të qarkullimit për qytetarët; zhvillimit urban dhe funksional të kësaj pjese të rëndësishme të qytetit
“Komuna e Çairit do të kontribuojë me përgatitjen e projektit urbanistik dhe atij të komunikacionit, duke garantuar zgjidhje të qëndrueshme dhe në interes të qytetarëve”.
“Ky është një investim real, i planifikuar dhe i votuar, që dëshmon angazhimin institucional për zhvillim dhe përmirësim të jetës së përditshme në Çair dhe në Shkup”, thonë këshilltarët e VLEN-it.