Kryetari i Aleancës për Shqiptarët, Ziadin Sela, sonte në emisionin “Debat në SHENJA” shprehu shqetësime dhe dilema lidhur me projektin “Qyteti i Sigurt”, duke vënë në pah mospërputhje mes investimeve teknologjike dhe gjendjes reale të infrastrukturës në disa komuna.
Sela theksoi se Komuna e Çairit, e cila sipas tij nuk ka infrastrukturë të zhvilluar siç duhet, po pajiset me teknologjinë më bashkëkohore në komunikacion, gjë që ngre pikëpyetje serioze mbi prioritetet e pushtetit.
“Nuk e di sa e ka realisht brengën ky pushtet për qytetarët. Nuk e kuptoj pse Qeveria po nxiton që ky ligj të miratohet pa një debat të mirëfilltë dhe pa u hapur tema të rëndësishme që lidhen me këtë projekt, i cili sipas vetë Qeverisë është shumë i rëndësishëm. Edhe ne mendojmë se nuk ka asgjë të keqe që siguria e qytetarëve të rritet çdo ditë, por realisht lindin shumë dilema”, deklaroi Sela.
Ai shtoi se është e pakuptimtë që një komunë me infrastrukturë që “nuk i ngjan këtij shekulli” të ketë teknologjinë më moderne në komunikacion, apo që numri i kamerave në Çair të jetë më i madh se në komunat e tjera.
“Sot mund të ndodhë që në rrugën ‘Xhon Kenedi’ të ketë më shumë kamera se në pjesën tjetër të qytetit të Shkupit”, përfundoi Sela. /SHENJA/