Pronari i klinikës private mbrëmë në emisionin “Show i mbrëmjes” në TV Alfa konfirmoi se ka pasur interesim dhe përpjekje nga ish-kryeministri dhe ish-ministri i Shëndetësisë, Zoran Zaev dhe Venko Filipçe, për të marrë pronësinë e “Zhan Mitrev”.
“Po, ka pasur kontakte të tilla reale. Edhe me shkrim, jo vetëm verbalisht”, ishte përgjigjja pohuese e Zhan Mitrevit.
Menjëherë pas këtyre pretendimeve, kryetari aktual i LSDM-së, Venko Filipçe, mbajti një konferencë të jashtëzakonshme për shtyp ku reagoi ashpër, duke vlerësuar se bëhet fjalë për një “fushatë të vazhdueshme të zezë dhe linçim publik” të drejtuar kundër tij. Ai i hodhi poshtë akuzat, duke pretenduar se përmes deklaratave të Zhan Mitrevit atij po i atribuohet shantazh dhe tentativë për marrjen e të gjithë spitalit.
Filipçe deklaroi se sulme të tilla kanë kaluar çdo kufi dhe paralajmëroi nisjen e procedurave gjyqësore kundër, siç tha ai, të gjithë të përfshirëve – si porositësve ashtu edhe ekzekutuesve. Njëkohësisht, ai e ftoi publikisht Zhan Mitrevin që, nëse ka çfarëdo njohurie për ndonjë vepër penale, të paraqesë kallëzim penal në prokurori.
“Nëse guxon, le të veprojë institucionalisht. Nëse ka diçka, le të provohet para prokurorit dhe gjykatës, e jo përmes paraqitjeve mediatike. Sepse e dinë se do të mbajnë përgjegjësi”, tha Filipçe, duke e akuzuar pushtetin se pikërisht raste të tilla janë arsyeja pse, sipas tij, nuk po zbatohen reforma thelbësore në drejtësi. (INA)