Pas plot tre orë bisedimesh në takimin e liderëve të iniciuar nga kryeministri Hristijan Mickoski, ku karrigia e LSDM-së mbeti bosh, nuk u arritën marrëveshje konkrete. Sipas informacioneve që morëm, në fillim u hapën çështjet e agjendës reformuese, si dhe nevoja për sigurimin e shumicës së Badenterit për zgjedhjen e Avokatit të Popullit, si edhe shumica prej dy të tretash për ligjin për sistemin “Safe City”, për të cilin u theksua se në afatin më të shkurtër duhet të gjendet zgjidhje që të mund të fillojë funksionimi nga 1 shkurti. Fokusi kryesor ishte shfuqizimi i qeverisë teknike, për të cilën Mickoski vlerëson se duhet të shfuqizohet, por për këtë ende nuk ka konsensus.
“Nëse nga LSDM-ja opozitare mendojnë se për zgjedhjet e ardhshme nevojitet qeveri teknike, në rregull, le të jetë për zgjedhjet e ardhshme, por të paktën pas tyre, kushdo që të fitojë, të mos ketë më qeveri teknike”, tha Mickoski.
Për këtë çështje nga BDI kanë propozuar që të zhvillohen konsultime me bashkësinë ndërkombëtare. Kryetari i partisë, Ali Ahmeti, theksoi se në vetë takimin kanë hapur edhe çështje shtesë, për të cilat është rënë dakord me kryeministrin Mickoski që të bisedojnë në një takim kokë më kokë.
“Sa i përket çështjes së qeverisë teknike, ne jemi të mendimit se duhet të konsultohemi në mënyrë shtesë me bashkësinë ndërkombëtare, të cilët janë bashkautorë të tekstit për qeverinë e Përzhinës”, deklaroi Ahmeti.
Sa i përket qeverisë teknike, nga VLEN janë të mendimit se ajo duhet të shfuqizohet, por për shkak se nuk ka konsensus të plotë, kjo të bëhet pas mbajtjes së zgjedhjeve të ardhshme parlamentare. Bilall Kasami ka hapur edhe çështjen e mundësisë më të madhe për votimin e diasporës.
“Duhet të gjendet mundësi për pjesëmarrje më të madhe të diasporës në votim, sepse vlerësojmë se diaspora është një faktor i rëndësishëm në lëvizjet ekonomike në shtet. Gjithashtu u hapën tema rreth njësive zgjedhore, por këtu nuk kemi qëndrim më të qartë nëse do të jetë një, tre, gjashtë si tani, apo ka propozime për tetë”, theksoi Kasami.
Pikërisht për Kodin Zgjedhor, nga ZNAM dhe nga Levica dolën me qëndrimin se nevojitet zgjidhje e re me një njësi zgjedhore dhe lista të hapura, ndërsa sa i përket qeverisë teknike janë të mendimit se ajo duhet të shfuqizohet. U hap edhe çështja e zgjedhjes së Avokatit të Popullit, për të cilën u tha se duhet të zgjidhet sa më shpejt.