Shkruan: Blerim Hyseni, këshilltar komunal në Kumanovë
Disa mezi presin të stigmatizojnë Sllupçanin, sikur i tërë fshati të jetë fajtor kolektiv për çdo ngjarje të izoluar. Por një rast nuk e përbuz dot tërë fshatin, ashtu siç një dukuri nuk e nënçmon dot tërë kombin. Të përgjithësosh është mënyra më e lehtë për të fshehur problemet reale dhe më e shpejta për të krijuar paragjykime të rreme.
Sllupçani ka dhënë shumë më tepër se disa duan të pranojnë, njerëz të ndershëm, punëtorë, profesionistë, intelektualë e kontribuues në çdo fushë. Fshati nuk matet me gabimet e dikujt, por me vlerat e shumicës. Dhe shumica i ka vlerat në vend që nuk del kush që mund t’ia kontestojë.
Kushdo që mundohet të etiketojë një komunitet të tërë, tregon më shumë për përbuzjen brenda vetes sesa për realitetin e këtij fshati. Sllupçani nuk është produkt i thashethemeve, por i punës, sakrificës dhe dinjitetit që ky vend ka trashëguar brez pas brezi.
Para se të gjykohet një fshat, duhet njohur një histori. Para se të vendoset njollë, duhet parë e vërteta. E vërteta është se Sllupçani nuk përfaqësohet nga një individ apo një incident, por nga banorë tërë që meritojnë respekt!